Баландлиги 16 қаватдан юқори бўлган бинолар, савдо мажмуалари ва автотураргоҳлар (паркинглар) ни лойиҳалаш ва қуриш қоидалари ишлаб чиқилади. Бу ҳақда Президентнинг 2024 йил 27 декабда қабул қилинган "Тадбиркорлар учун тенг шароитлар ва адолатли рақобат муҳитини таъминлаш бўйича навбатдаги чора-тадбирлар тўғрисида"ги фармони йўл харитасида белгиланган.

Ҳужжат билан, шаҳарлардаги автотураргоҳларни зоналарга ажратган ҳолда режалаштириш нормаларини қайта кўриб чиқиш белгиланган. Қурилиш ва уй-жой коммунал хўжалиги вазирлигига жорий йилнинг декабригача шаҳарсозлик нормалари ва қоидаларини ишлаб чиқиш вазифаси қўйилди.

Шунингдек, “Шаффоф қурилиш” миллий ахборот тизимида тадбиркорларнинг лизингга олинган техникаси ҳисобини юритиш бўйича ўзгартиришлар киритиш белгиланди. Жорий йилнинг августигача Қурилиш ва уй-жой коммунал хўжалиги вазирлиги, Иқтисодиёт ва молия вазирлиги, Ички ишлар вазирлиги ва Савдо-саноат палатаси ҳукумат қарори лойиҳасини ишлаб чиқиши керак.

Бундан ташқари, қурилишда энергия самарадор ва энергия тежамкор қурилиш материаллари (газобетон, пенобетон, полистиролбетон, базальт асосида иссиқлик сақловчи материаллар, полистирол сендвич панеллари) дан фойдаланиш бўйича мавжуд стандартларни қайта кўриб чиқиш ва янгилаш бўйича топшириқ берилди.