Мамлакатимизда ёшларни қўллаб-қувватлаш, уларнинг иқтидор ва салоҳиятини рўёбга чиқариш мақсадида турли йўналишларда амалга оширилаётган лойиҳалар уларнинг ҳаётида катта аҳамият касб этмоқда.

Шу маънода, “Бизнесга биринчи қадам” ҳамда “Ёшлар учун иш ўринлари” каби дастурлар ёшларнинг тадбиркорлик фаолиятини ривожлантириш, уларнинг ўз бизнесини йўлга қўйиш ва янги иш ўринларини яратишда муҳим имкониятлар эшигини очмоқда.

Қуйидаги мақолада ёшлар учун яратилган имкониятлар, уларнинг тадбиркорликдаги қадамлари ва келажакка йўналтирилган дастурлар ҳақида қисқача маълумот берилади.

1. “Бизнесга биринчи қадам” лойиҳаси.

Унга кўра, 18 ёшдан 30 ёшгача бўлган ўзини ўзи банд қилган ёшларга Алоқабанк орқали 100 млн сўмгача имтиёзли микрокредит ажратилади.

Кредит 7 йилгача муддатга асосий қарздан 2 йилгача, фоиз тўловларидан эса 3 ойгача имтиёз билан берилади.

Қандай йўналиш учун ажратилади?

— экин етиштириш, чорвачилик, паррандачилик ва бошқа қишлоқ хўжалиги соҳалари;

— ишлаб чиқариш ва хизмат кўрсатиш, ҳунармандчилик жиҳозларини сотиб олиш ва айланма маблағларни тўлдиришга;

— фан, санъат ва спортдаги иқтидорли ёшларни ҳамда фрилансерлик хизматларини кўрсатувчи ёшларни қўллаб-қувватлаш учун.

“Бизнесга биринчи қадам” ёшларнинг жамиятда муносиб ўрин эгаллаши ва ўз мақсадларини амалга ошириш имкониятидир.

2. Ёшлар бандлигини таъминлаш ҳамда уларнинг тадбиркорлигини қўллаб-қувватлашга қаратилган “Ёшлар учун иш ўринлари” лойиҳаси.

Лойиҳа доирасида ЯТТ ёшлар, шунингдек таъсисчилари ёшлардан иборат кичик бизнес вакилларига 5 млрд сўмгача имтиёзли кредит ажратилади.

Ушбу кредитлар ёшлар учун камида 20 та янги иш ўрни яратадиган лойиҳаларга йўналтирилади.

Кредит йўналишлари:

— ишлаб чиқариш асбоб-ускуналари хариди, қурилиш ишлари ва асосий воситаларни олиш;

— тижорат транспортлари сотиб олиш;

— савдо ва хизмат кўрсатиш шохобчаларини ташкил этиш;

— ёшларни касб-ҳунарга ўқитиш, рақамли технологиялар ва хорижий тиллар йўналишида таълим хизматлари ташкил этиш.

Президентимизнинг ёшлар келажагига қаратган эътибори ва ғамхўрлиги орқали минглаб ёшлар ўз бизнесини йўлга қўйиш ҳамда тенгдошлари учун иш ўринлари яратиш имкониятига эга бўлмоқда.