Адлия вазирлиги қошидаги “Адолат” миллий ҳуқуқий ахборот маркази ҳамда Ўзбекистон давлат жаҳон тиллари университети ўртасида ҳар томонлама ҳамкорликни янада мустаҳкамлаш тўғрисида ўзаро ҳамкорлик Меморандуми имзоланди.

Мазкур ҳужжат олийгоҳ ва марказ ўртасида шериклик муносабатларини ўрнатиш ҳамда узоқ муддатли, самарали, ўзаро манфаатли ҳамкорликни ривожлантириш, қолаверса биргаликдаги лойиҳаларни амалга оширишга қаратилган. Бунда яхши ният, ўзаро ҳурмат ҳамда ишонч асосида умумий қабул қилинган амалиётдан келиб чиққан ҳолда маълумот алмашиш ва тақдим этиш, илмий-амалий коньференциялар, форумлар, семинарлар ташкил қилиш, амалиёт ёки стажировка учун йўллаш ва қабул қилиш бўйича ҳамкорлик қилиш назарда тутилгани эътирофга молик.

Бундан ташқари, ҳамкорлик доирасида бепул асосда сафар-маърузалар ўтказиш, шунингдек, университет талабалари учун марказга экскурсиялар ташкил этилади. Инновацион лойиҳаларни биргаликда ишлаб чиқиш ҳамда янги инновацион технологияларни амалиётга жорий этиш эса ўзаро ҳамкорликни янада мустаҳкамлайди.

Албатта, ҳалол рақобат асосланган ва амалдаги қонунчиликка тўла мос келадиган ҳамкорлик меморандуми малакали, ҳуқуқий билими теран мутахассисларни тайёрлашда муҳим омил бўлиб қолади.