Ўзбекистон Республикасининг 28.11.2022 йилдаги "Кўчмас мулкка бўлган ҳуқуқларни давлат рўйхатидан ўтказиш тўғрисида"ги ЎРҚ-803-сон қонунига асосан кўчмас мулкнинг кадастр йиғмажилдини шакллантириш учун бир қанча асослар мавжуд  бўлиши лозим. Булар:

◾️ ер участкаларининг берилганлиги (реализация қилинганлиги);

◾️ бинонинг, иншоотнинг қурилганлиги ва фойдаланишга топширилганлиги;

◾️ белгиланган тартибда ажратилган ер участкасида қурилиши тугалланмаган объектнинг мавжудлиги;

◾️ кўчмас мулкнинг бўлинганлиги;

◾️ кўчмас мулкнинг бирлаштирилганлиги.

Кўчмас мулк эгалари томонидан ер учаскларида қўшимча қурилишлар амалга оширганда кадастр паспортига ўзгартишлар киритиш шарт бўлади. Кўчмас мулкнинг кадастр йиғмажилдига ва кадастр паспортига ўзгартишлар киритиш учун қуйидагилар асос бўлади:

◾️ер участкасининг чегараси ўзгарганлиги (чизиқларнинг узунлиги, ер участкасининг бурилиш нуқталари сони ёки унинг чегарасининг бурилиш бурчаклари ўзгарганлиги, бунда кадастр рақами ва ер участкасининг мўлжалланган мақсади ўзгармайди);

◾️бинонинг, иншоотнинг юқори қавати, уйга туташ қисм, алоҳида жой қурилганлиги ва фойдаланишга топширилганлиги;

◾️ бинонинг, иншоотнинг қайта қурилганлиги ва фойдаланишга топширилганлиги;

◾️бинонинг, иншоотнинг, қурилиши тугалланмаган объектнинг бир қисми бузилганлиги (вайрон бўлганлиги) ёки йўқ қилинганлиги;

◾️ кўчмас мулкнинг мўлжалланган мақсади ўзгарганлиги;

◾️қурилиши тугалланмаган объектнинг қурилиши тугалланганлиги ва фойдаланишга топширилганлиги.

Кўчмас мулкка бўлган ҳуқуқ тури ёки ҳуқуқ эгаси ўзгарганда кадастр паспорти ўзгартирилмайди. Кўчмас мулкнинг бир қисми бошқа шахсга ўтказилганда ёки унга ўзгартишлар киритилганда (реконструкция қилиш, қўшимча иморат қуриш ва (ёки) алоҳида иморат қуриш), кўчмас мулкка бўлган ҳуқуқни давлат рўйхатидан ўтказиш кўчмас мулкнинг кадастр йиғмажилди шакллантирилганидан ва кадастр паспорти берилганидан кейин амалга оширилади.

Алоҳида этибор қаратиш лозимки, Ўзбекистон Республикасининг Маъмурий жавобгарлик тўғрисидаги кодекси 60-моддасига асосан, Ўзбошимчалик билан эгаллаб олинган, ажратилган ер участкасига туташ бўлган ва туташ бўлмаган ер участкаларида қурилиш ишларини амалга ошириш, — фуқароларга базавий ҳисоблаш миқдорининг икки юз баравари, мансабдор шахсларга эса — тўрт юз баравари миқдорда жарима солишга сабаб бўлади.

Бехруз Жўраев,
"Адолат" МҲАМ ходими