Агар ходим меҳнат интизомини мунтазам бузиб келган тақдирда, иш берувчининг ташаббусига кўра, меҳнат шартномасини бекор қилиш қандай амалга оширилади?

Меҳнат кодексининг 161-моддаси иккинчи қисмининг 4-банди орқали меҳнат шартномасини ходимнинг ўз меҳнат мажбуриятларини мунтазам равишда бузганлигини асос қилиб меҳнат шартномасини бекор қилиш мумкин.

Бунда, модданинг ушбу бандида эътибор берадиган жиҳатлар бор.

Меҳнат кодексининг 161-моддаси иккинчи қисмининг 4-банди шундай келтирилади:

ходимнинг ўз меҳнат мажбуриятларини мунтазам равишда бузганлиги. Аввал меҳнат мажбуриятларини бузганлиги учун ходим интизомий ёки моддий жавобгарликка тортилган ёхуд унга нисбатан меҳнат тўғрисидаги қонунчиликда ва меҳнат ҳақидаги бошқа ҳуқуқий ҳужжатларда назарда тутилган таъсир чоралари қўлланилган кундан эътиборан бир йил ичида ходим томонидан такроран интизомий ножўя ҳаракат содир этилганлиги меҳнат мажбуриятларини мунтазам равишда бузишдир.

Яъни бу асос билан меҳнат шартномасини бекор қилишда ходим содир этган интизомий қилмиши учун МК 312-моддасида келтирилган интизомий жазолардан бирига тортилган ёки меҳнат тўғрисидаги қонунчиликда ва МК 12-моддасидаги меҳнат ҳақидаги бошқа ҳуқуқий ҳужжатларда назарда тутилган таъсир чоралари қўлланилган бўлиши лозим.

Шу интизомий жазо, моддий жавобгарлик, таъсир чоралари қўлланилгандан бошлаб бир йил ичида яна такроран интизомий қилмишни содир этганлиги ходимнинг меҳнат мажбуриятларини мунтазам бузиши ҳисобланади.

Ходим бир йил ичида икки интизомий қилмишни содир этган бўлса ҳам, шунингдек МКнинг 314-моддасидаги интизомий жазони қўллаш муддатларига амал қилинган бўлса ҳам, бир йил ичида интизомий қилмиш бошқа интизомий қилмиш учун интизомий жазо қўлланилгандан кейин содир этилмаса, меҳнат интизомини мунтазам бузиш, деб топилмайди.

Меҳнат интизомини мунтазам бузиш деб топиш учун, мисол учун, ходим 1.01.2025 да интизомий қилмиш содир этган бўлса, шу қилмиш учун интизомий жазо чораси қўлланилади ва ходим 1 йил ичида яна интизомий қилмиш содир этиши керак.

Агар ходим бир йил ичида 10 марта интизомий қилмиш содир этса ҳам, шуларнинг бирортаси интизомий жазо чорасидан кейин амалга оширилмаган бўлса, меҳнат интизомини мунтазам бузиш деб топилмайди.