Юридик шахс сифатида давлат рўйхатидан ўтмасдан тадбиркорлик фаолияти билан шуғулланиш — ҳуқуқбузарлик ҳисобланади ва қонунчиликда белгиланган тартибда жавобгарликка тортилади.

Агар шундай фаолият олиб бориш жараёнида катта бўлмаган назорат қилинмайдиган даромад олинса, ҳуқуқбузарлик ашёлари (яъни, мазкур фаолиятда фойдаланилган воситалар, товарлар ва бошқа ашёлар) мусодара қилиниб, шахсга базавий ҳисоблаш миқдорининг беш баробаридан етти баробаригача миқдорда жарима солинади.

Агар ушбу ҳуқуқбузарлик анча миқдорда назорат қилинмайдиган даромад олиш билан содир этилган бўлса, ашёлар мусодара қилиниб, етти баробардан ўн баробаригача миқдорда жарима белгиланади.

Фаолият орқали кўп миқдорда назорат қилинмайдиган даромад олинган ҳолларда эса, бу оғирроқ ҳуқуқбузарлик ҳисобланиб, ашёлар мусодара қилиниб, базавий ҳисоблаш миқдорининг ўн баробаридан эллик баробаригача жарима солиниши мумкин.

Бироқ, агар шахс ушбу ҳуқуқбузарликни биринчи марта содир этган бўлса ва у ҳуқуқбузарлик аниқланган пайтдан эътиборан 30 кун ичида:

— давлатга солиқлар ва йиғимлар кўринишида етказилган зарарни ихтиёрий равишда қопласа;

— тадбиркорлик субъекти сифатида давлат рўйхатидан ўтса;

— зарур рухсатномалар ва лицензияларни расмийлаштирса, у ҳолда ушбу шахс жаримадан ва фаолиятда фойдаланилган ашёларни мусодара қилишдан озод этилади.