Вазирлар Маҳкамасининг “Аёллар дафтари”, “Ёшлар дафтари” ва “Саховат ва кўмак” жамғармалари маблағлари ҳисобидан ижтимоий ёрдам кўрсатиш тизимини такомиллаштириш чора-тадбирлари тўғрисида”ги қарори қабул қилинди.

 Ҳужжатга кўра, 2025 йил 15 августгача “Ягона миллий ижтимоий ҳимоя тизими” ахборот тизими орқали “Саховат ва кўмак” жамғармаси маблағлари ҳисобидан ваучер асосида ёрдам кўрсатиш тизимини жорий этиш режалаштирилган. Бунда мазкур тизимни жорий этиш тажриба тариқасида Тошкент шаҳри ва Андижон вилоятининг туман (шаҳар)ларида амалга оширилади.

 Бундан ташқари, “Аёллар дафтари” жамғармаси маблағлари ҳисобидан кам таъминланган оилаларга мансуб хотин-қизларга уй-жой ижараси тўловининг 50 фоизи, бироқ  БҲМнинг 2 бараваридан кўп бўлмаган миқдорда, Тошкент, Нукус шаҳарлари ва вилоят марказларида эса БҲМнинг 3 бараваригача бўлган қисми қоплаб берилади.

 “Аҳолини ижтимоий ҳимоя қилиш тизимини молиялаштириш тартиб-таомилларини такомиллаштириш тўғрисида”ги ПФ-17-сонли Фармонига мувофиқ:

уй-жой шароитларини яхшилаш ва соғлиқни сақлаш бўйича ижтимоий ёрдам эса оиланинг ҳар бир аъзосига тўғри келадиган энг кам истеъмол харажатларининг икки бараваридан ошмайдиган ойлик даромадга эга оилаларга ҳам тақдим этилади.

Шунингдек, хотин-қизларнинг бандлиги ва ижтимоий фаоллигини таъминлашга қаратилган ижтимоий лойиҳаларни молиялаштириш учун грантлар ажратилди. Унга кўра:

— Камбағал оилалар реестрига киритилган оилаларнинг олий таълим ташкилотларида таълим олаётган хотин-қизлар ёки уларнинг икки ва ундан ортиқ фарзандларининг бир нафарига тўлов-контракт суммасининг 50 фоизигача, БҲМнинг 50 бараваридан кўп бўлмаган миқдорда;

— Хотин-қизларга турар жой ижараси учун компенсация тўлаб бериш тарзидаги ижара тўловининг 50 фоизи, бироқ БҲМнинг 2 бараваригача;

— Хотин-қизларнинг уй-жойини таъмирлаш учун БҲМнинг 50 бараваригача миқдорда маблағ ажратилади.

Шунингдек, аҳолининг турли қатламларига, бир марталик моддий ёрдам кўрсатиш “Аёллар дафтари”га киритилган қуйидаги тоифадаги хотин-қизлар учун берилади:

— боқувчиси бўлмаган эҳтиёжманд хотин-қизлар;

— ижтимоий ёрдамга муҳтож I ва II гуруҳ ногиронлиги бўлган, шунингдек, тезкор тиббий муолажага муҳтож эҳтиёжманд хотин-қизларга;

— қарамоғида ногиронлиги бўлган фарзанди мавжуд эҳтиёжманд хотин-қизларга.