Ҳар бир гуруҳда болалар сони нечта бўлиши керак? Давлат боғчалари ва хусусий боғчаларда ёш чегараси қандай? Кимлар имтиёзли навбатга қўйилади? Hudud24.uz бугун болаларни боғчага жойлаштириш ва бошқа шу билан боғлиқ масалалар ҳақида муҳим маълумотларни тақдим этади.

1. Болалар боғчага неча ёшдан қабул қилинади?

Давлат боғчаларига 3 ёшдан 7 ёшгача бўлган болалар қабул қилинади. Хусусий боғчаларга қабул қилиш ёши ва тартиби ушбу боғчалар томонидан мустақил белгиланади. Бундан ташқари, 3 ёшгача бўлган болаларни қабул қилиш пуллик хизмат кўрсатиш шаклида амалга оширилади. Гуруҳга болалар уларнинг ота-оналари ёки уларнинг ўрнини босувчи шахсларнинг ва бола соғлиғи ҳолати тўғрисидаги тиббий хулоса асосида қабул қилинади. Ҳар бир гуруҳда болаларнинг сони 20 нафардан ортиқ бўлишига йўл қўйилмайди.

2. Анкета қандай тўлдирилади?

Давлат боғчасига болани жойлаштириш учун биринчи навбатда анкета тўлдириш зарур бўлади. Анкетани 2 хил усулда тўлдириш мумкин:

• Ота-оналар ёки уларнинг ўрнини босувчи шахслар томонидан давлат хизматлари марказига мурожаат қилиш орқали.
• Ягона интерактив давлат хизматлари портали (my.gov.uz)да тегишли электрон анкетани тўлдириш орқали.

Йўлланма олиш фақат анкетани тўлдириш орқали амалга оширилади. Бунда йўлланма олишдаги имтиёзлар мавжуд бўлса, тегишли ҳужжатларнинг асл нусхалари кўрсатилади.

3. Йўлланма қандай олинади?

Боғчага бериш ҳақида анкета тўлдиришда танланган боғчада бўш ўрин мавжуд ёки мавжуд эмаслиги автоматик тарзда маълум бўлади. Агар бўш ўрин бўлмаса бўш ўринга эга бошқа боғчани танлаш ёки бўш ўрин бўлганда қайта йўлланма олиш учун навбатга кириш (бунда бирданига 2 та боғчани танлаш имконияти бўлади) мумкин. Тақдим этилган анкетада ишончсиз ёки нотўғри маълумотларнинг мавжудлиги йўлланмалар беришнинг рад этилиши учун асос бўлади. Бироқ, бошқа асослар бўйича йўлланма беришни рад қилишга йўл қўйилмайди. Йўлланма бўш жой пайдо бўлгандан бошлаб 1 иш куни ичида берилади. Йўлланма олингандан кейин 15 кун ичида боғчага олиб борилиши керак. Ушбу муддат ўтганидан кейин тақдм этилган йўлланмалар қабул қилинмайди. Бола боғчага йўлланма тақдим этганидан кейин 1 иш кунида қабул қилинади.

4. Болани боғчага жойлаштириш учун қанча пул тўланади?

Болаларни боғчага қабул қилиш бепул амалга оширилади.

5. Боғчага жойлаштиришда кимларга имтиёз берилади?

Болаларни боғчага жойлаштиришда қуйидаги шахсларга имтиёз ва афзалликлар берилади:

• I ва II гуруҳ ногиронлиги бўлган шахсларнинг болалари;
• кўп болали оилаларнинг болалари;
• етим болалар ёки ота-онасининг қаровисиз қолган болалар;
• “Аёллар дафтари”га киритилган ижтимоий ҳимояга муҳтож ёлғиз аёлларнинг болалари;
• шартнома бўйича ҳарбий хизматчиларнинг ва ички ишлар органлари ходимларининг болалари;
• талабалар ва педагогларнинг болалари;
• акалари ёки опалари ушбу муассасанинг тарбияланувчилари жумласига кирадиган болалар;
• кўп тармоқли ихтисослаштирилган боғчалардан умумий турдаги боғчаларга ўтказилаётган соғайган болалар.

Эслатма!!! Боғчага жойлаштиришда ортиқча ҳужжатлар талаб қилиш, ортиқча тўловлар ундириш ва шунга ўхшаш ноқонуний ҳолатлар юз берса Мактабгача ва мактаб таълими вазирлигининг (71)-202-09-09 рақамли ишонч телефонларига қўнғироқ қилиш, https://uzedu.uz/ сайти орқали электрон тарзда ва шахсан ташриф буюриш орқали мурожаат қилиш мумкин.