Давлат хизматида билимли, тажрибали, шу билан бирга муомала маданияти юқори, этика, эстетика қоидаларидан хабардор шахслар ишлаши керак. Бу бутун дунёда —демократик жамиятларда давлат хизматчилари амал қиладиган ёзилган ва ёзилмаган қонунлардир. Ўзбекистонда ҳар хил соҳа вакиллари, турли идоралар хизматчиларининг ички одоб-ахлоқ қоидалари шаклланган. Аммо қонунчиликда барча давлат хизматчилари бирдек амал қилиши лозим бўлган ягона одоб-ахлоқ қоидалари мезони мавжуд эмас эди. Сўнгги пайтларда давлат органи ходимларининг фуқаролар билан муносабатларидаги кескинлик, мансабдор шахсларнинг қўпол муомаласи ва бунинг оқибатида келиб чиққан нохуш ҳолатларга кўп марта гувоҳ бўлдик. Шу каби кўпгина омиллар ва сабаблар ҳисобга олиниб, давлат хизматчилари учун умумий одоб-ахлоқ қоидалари ишлаб чиқилди. Энди одобсиз ва ахлоқсиз шахслар давлат ишида ишлаши мумкин эмас. 14 октябрь куни Ҳукуматнинг “Давлат фуқаролик хизматчилари томонидан одоб-ахлоқ қоидаларига риоя этилишини таъминлаш бўйича қўшимча чора-тадбирлар тўғрисида”ги 595-сонли қарори қабул қилинди. Қарор 15 октябрдан кучга кирди. Мазкур қарор билан: Давлат фуқаролик хизматчилари одоб-ахлоқининг намунавий қоидалари; Одоб-ахлоқ комиссияси тўғрисидаги намунавий низом тасдиқланди. Низом билан касбий фаолиятга оид, хизмат фаолиятига оид ҳамда хизматдан ташқари одоб-аҳлоқ қоидалари тартибга солинади. Намунавий қоидаларга мувофиқ, давлат фуқаролик хизматчилари меҳнат фаолияти давомида ва ишдан ташқари вақтда хулқ-атворнинг қуйидаги умумий қоидаларига амал қилиши лозим:

• давлат хизматининг обрўсига путур етказиши мумкин бўлган хатти-ҳаракатлардан тийилиш;
• масъулият,  касбига садоқат ва ҳалолликни кундалик шиорга айлантириш;
• мураккаб вазифаларни бажаришда ҳамкасбларига кўмаклашиш;
• хушмуомалалик, эътиборлилик ва хушёрлик билан фуқароларда давлатга нисбатан ишонч ва ҳурмат ҳиссини уйғотиш;
• оиласида соғлом муҳитни таъминлаб, оила аъзоларига доимий ғамхўр бўлиш, фарзандларида ватанпарварлик ва бошқа юксак ахлоқий фазилатларни шакллантириш;
• фуқароларнинг ижтимоий келиб чиқиши, иқтисодий аҳволи бошқа омиллардан қатъи назар улар билан бир хил, самимий, одоб доирасида муносабатда бўлиш;
• жамиятда ахлоқнинг умумэътироф этилган қоидаларига амал қилиш.
• Давлат органлари, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ва бошқа ташкилотлар жорий йилнинг 25 октябрь санасига қадар ўз фаолияти хусусиятларини ҳисобга олган ҳолда одоб-ахлоқ қоидаларини тасдиқлайди.
• Мазкур ҳужжатда одоб-ахлоқ қоидаларини бузган хизматчиларга интизомий ва бошқа турдаги жавобгарлик чоралари кўрилиши мумкинлиги кўзда тутилмоқда. Илгари раҳбару амалдорлар ўзини давлат хизматчиси сифатида муносиб тутмаган, инсон шахсиятини таҳқирловчи ҳақоратлар билан одамларни аямаган ва битта “узр” билан қутулган бўлса, энди маълум жавобгарликка бўйин эгади. Хушмуомала бўлмадими обрўйи тушади, эътиборли бўлиб, фуқаролар мурожаатини тингламадими бунинг учун жавоб беради.    Бундан ташқари давлат фуқаролик хизматида ишламоқчи ва ўсмоқчи бўлган шахс оилавий муҳитини  намунадагидек қилиб қўйиши керак. Давлат хизмачиларининг оила аъзоларига ғамхўр бўлиши, фарзандларини муносиб тарбиялашига ҳам алоҳида эътибор берилади. Туб аҳоли билан бевосита муомала қиладиган, жамиятнинг ижтимоий, иқтисодий, маънавий ҳаётини қайсидир маънода белгилаётган давлат органи ходими биринчи навбатда ўзи ҳар жиҳатдан намуна бўлишга арзигулик бўлсин!
• Давлат хизматчиларининг фаолияти учун ахлоқий мезонлар ҳар томонлама ҳисобга олингани, асосийси, бу қоидаларни бузганларга жавобгарликнинг белгиланаётгани айрим мансабдорларнинг халқ тили билан айтганда “ўзини йиғиб олиши”, “ўйлаб гапириши” учун муносиб сабаб бўлади, деб ўйлаймиз. Бу орқали мансабдорлар ва бошқа давлат органи ходимларида одоб-ахлоқ қоидаларига нисбатан мустаҳкам иммунитет ҳосил бўлишига умид қиламиз.