Ортиқча вақт ва маблағ йўқотмасдан, уйдан чиқмасдан ҳам давлат ташкилотларига мурожаат қилиш мумкин. Ўзбекистонда мурожаатлар билан ишлаш ягона онлайн платформаси (https://murojaat.gov.uz/) фаолияти йўлга қўйилган. Платформадан қандай фойдаланиш мумкин? Қайси идораларга, қандай масалаларда мурожаат қилса бўлади? Hudud24.uz платформадан фойдаланиш, мурожаатлар ҳолатини текшириш, эътибор қаратиш керак бўлган ҳолатлар ҳақида маълумот беради.  

1. Платформадан қандай фойдаланиш мумкин?

Ушбу платформадан фойдаланиш учун дастлаб тегишли маълумотларни киритган ҳолда рўйхатдан ўтилади. Бир марта рўйхатдан ўтгандан сўнг, кейинги киришлар учун One-ID рақамини киритишнинг ўз етарли.

Бунда ариза, шикоят ёки таклифни тегишли ташкилотга юбориш мумкин.

Мурожаат юбориш учун шахсни тасдиқловчи маълумотлар (паспорт серияси, рақами ҳамда туғилган сана) киритилади. Шахсни тасдиқловчи ҳужжат сифатида фуқаролик паспорти, ID-карта ва хорижга чиқиш паспортидан фойдаланиш мумкин.

Бунда шахсга доир маълумотлар учинчи шахсларга ошкор этилмайди ва тарқатилмайди!

Шахсни тасдиқловчи маълумотларни киритиш қуйидаги афзалликларга эга:

• мурожаат юбориш шаклининг кўплаб қисмлари автоматик равишда тўлдирилади;
• киритилган мурожаат номингизда сақланади ва уни исталган пайтда id.egov.uz хизмати орқали тизимга кириб топишингиз мумкин бўлади;
• мурожаатни асоссиз равишда кўрмасдан қолдириш ҳолатларининг олди олинади.

2. Қайси ташкилотга мурожаат юбормоқчисиз? Рўйхатдан танланг.

Мазкур платформа орқали Бош прокуратура, Мажбурий ижро бюроси, Марказий сайлов комиссияси ва Олий суд каби 10 та марказий муассасаларга, шунингдек, 21 та вазирлик, 4 та қўмита, 10 та агентлик, 14 та маҳаллий давлат ҳокимият органлари ҳамда 17 та бошқа давлат корхоналарига, умуман олганда, 80 дан ортиқ ташкилотларга электрон кўринишдаги мурожаатлар юбориш мумкин. Бундан ташқари, ушбу ягона платформада фақатгина марказий муассасаларгагина эмас, балки уларнинг ҳудудий бўлимлари ва тизимидаги қуйи ташкилотларга ҳам мурожаатлар юбориш имконияти яратилган.

3. Мурожаатингиз ҳолатини текшириб туринг.

Мазкур ягона платформанинг яна бир қулайлиги – мурожаатингиз қайси ташкилотга тегишли эканлигини белгилаб, унинг ҳолатини текшириб туришингиз мумкин. Бунинг учун платформа томонидан берилган мурожаат рақами ҳамда мурожаатингиз ҳолатини текшириш учун Сизга келган кодни киритиш керак бўлади.

4. Ўзингизни қизиқтирган саволларга жавоб топинг.

Ушбу ягона платформа орқали меҳнат муносабатлари, пенсия ва ижтимоий ҳимоя, уй-жой, ер ва коммунал, соғлиқни сақлаш, оилавий масалалар, ногиронлиги бўлган шахсларга имтиёзлар, таълим, солиқ, транспорт, истеъмолчи ҳуқуқлари, вояга етмаганлар ҳуқуқлари каби мавзулардаги маълумотларни олиш мумкин.

Мақсуд Мустафоев,

Hudud24.uz колумнисти