Президентнинг ПФ-174-сонли Фармони енгил саноатни ривожлантириш учун аниқ ва тизимли ёндашув яратади. Агентлик ва Жамғарманинг ташкил этилиши, молиявий қўллаб-қувватлаш чоралари, ҳамда ҳудудлардаги корхоналар учун яратилган имтиёзлар соҳани жадал ривожлантиришга, маҳсулот сифатини оширишга ва экспорт салоҳиятини кучайтиришга қаратилган муҳим қадамлардир.

Фармонга кўра, Ўзбекистон Республикаси Вазирлар Маҳкамаси ҳузурида Енгил саноатни ривожлантириш агентлиги ташкил этилди. Агентлик соҳадаги устувор йўналишларни белгилаш ва амалга ошириш бўйича асосий давлат органи ҳисобланади.

Агентликка қуйидаги муҳим вазифалар юклатилган:

• Ишлаб чиқаришни кўпайтириш: Тўқимачилик, чарм-пойабзал ва бошқа соҳаларда ишлаб чиқариш ҳажмини оширишга ёрдам бериш.

• Экспортни рағбатлантириш: Янги бозорлар топиш, халқаро кўргазмаларда иштирок этиш, хорижий брендларни жалб қилиш, миллий брендларни ривожлантириш ва логистикани яхшилаш.

• Инвестиция жалб қилиш: Тўқимачилик, чарм-пойабзал ва ипак саноатига сармоя киритишни қўллаб-қувватлаш. Хорижий корхоналарнинг ишлаб чиқариш қувватларини Ўзбекистонга кўчириш (релокация) бўйича инвесторлар билан ишлаш.

Молиявий қўллаб-қувватлаш учун Енгил саноатни қўллаб-қувватлаш жамғармаси (Жамғарма) ташкил этилди. Жамғармага Тикланиш ва тараққиёт жамғармасидан 2030 йилгача қайтариш шарти билан йилига 4 фоизда 200 миллион АҚШ доллари берилади. Бу маблағлар корхоналарни айланма маблағ билан таъминлашга йўналтирилади.

Жамғарма маблағлари ҳисобидан 2025 йил 1 октябрдан бошлаб корхоналарга қуйидаги молиявий ёрдамлар кўрсатилади:

• Халқаро брендларни жалб қилиш, сертификатлаш ва мутахассисларни ўқитиш учун грантлар ажратиш.

• Хорижда савдо уйларини очиш ва ижара харажатларининг бир қисмини қоплаш.

• Халқаро кўргазмаларда иштирок этиш ва хорижий мутахассисларни жалб қилиш харажатларини қоплаш.

Олис туманлардаги ишлаб чиқаришни рағбатлантиришга ҳам эътибор қаратади.

Хусусан, 3-5-тоифадаги туманларда филиал очган тўқимачилик ва тикув-трикотаж корхоналарига қуйидаги ҳудудий ривожланиш ва имтиёзлар берилади:

•    200 та иш ўрни яратиш ва ўртача ойлик маошни 2,5 миллион сўмдан кам бўлмаслиги шарти билан, 10 миллиард сўмгача кредит Марказий банк асосий ставкасида беш йилга берилади.

• Хориждан жалб қилинган дизайнер, технолог ва маркетологларнинг ойлиги қисман қоплаб берилади.

Бундан ташқари, Агентлик Ўзбек-Корея ўқув-амалий тўқимачилик технопарки негизида замонавий тўқимачилик лабораториясини ташкил этиш ва уни халқаро аккредитациядан ўтказишни таъминлаши керак. Шунингдек, уч ой муддатда “Fashion business incubator” лойиҳасини амалга ошириш учун 5 миллиард сўм ажратиш чоралари кўрилади.

Хулоса қилиб айтганда, ушбу Фармон енгил саноатни комплекс ривожлантиришга қаратилган муҳим қадам бўлиб, соҳага янгича ёндашувни жорий этади. Агентликнинг ташкил этилиши, Жамғарманинг молиявий ресурслари ва белгиланган рағбатлантириш чоралари Ўзбекистоннинг тўқимачилик, чарм-пойабзал, ипакчилик ва гиламчилик саноатларини жаҳон бозорида рақобатбардош қилишга хизмат қилади. Ушбу чоралар орқали маҳаллий ишлаб чиқарувчиларнинг экспорт салоҳиятини ошириш, сифатни яхшилаш ва янги иш ўринларини яратиш кўзда тутилган.

Турғунали Тошболтаев,
"Адолат" МҲАМ ходими