Мамлакатимизда юқори малакали кадрлар тайёрлаш жараёнини сифат жиҳатдан янги босқичга кўтариш, иш берувчи корхона ва ташкилотларни таълим жараёнига жалб этиш ҳамда олий ва касбий таълим ташкилотлари битирувчиларининг якуний давлат аттестациясини ўтказиш тартибини такомиллаштириш муҳим аҳамиятга эга. Вазирлар Маҳкамасининг 2024 йил 13 декабрда қабул қилинган “Олий ва касбий таълим ташкилотлари битирувчиларининг якуний давлат аттестациясини ташкил этиш чора-тадбирлари тўғрисида”ги 836-сон қарори якуний давлат аттестациясини ташкил этишнинг ҳуқуқий асосини белгилайди.

Бу қарорга кўра 2025 йил 1 январдан бошлаб, олий ва касбий таълим ташкилотлари битирувчиларининг якуний давлат аттестациясини иш берувчи корхона ва ташкилотларда ҳам ташкил этиш амалиёти жорий этилди.

Қоидага кўра, аттестациялар олий таълим ташкилотидаги ҳар бир бакалавриат таълим йўналиши ва магистратура мутахассислиги бўйича ташкил этиладиган комиссия томонидан, таълим йўналишлари ва мутахассисликларнинг хусусиятидан келиб чиқиб, олий таълим ташкилотида ёки корхонада (ташкилотда) ўтказилиши мумкин.

Aттестациялар қуйидаги шаклларда ўтказилиши белгиланган:
•    хорижий тил бўйича синов;
•    махсус (мажбурий) фанлар бўйича синов;
•    битирув малакавий иши ҳимояси;
•    диплом лойиҳаси ҳимояси;
•    магистрлик диссертацияси ҳимояси;
•    таълим йўналиши ва мутахассисликка мос “стартап” ҳамда лойиҳаси рационализаторлик ғояси тақдимоти.

Олий ва касбий таълим ташкилотларида битирувчиларнинг якуний давлат аттестасиясини ўтказиш тартибини янада тушунарли ва қулай тарзда фойдаланувчиларга етказиш мақсадида “Олий ҳамда касбий таълим ташкилотлари битирувчиларининг якуний давлат аттестациясини ўтказиш бўйича услубий қўлланма” ҳам ишлаб чиқилган. Қўлланма ўқув жараёнида иштирок этувчи мутахассислар ва иш берувчилар учун аниқ тартиб-қоидаларни баён этади. Қўлланма тавсия сифатида ишлаб чиқилган бўлиб, унда олий ва касбий таълим ташкилотларининг битирувчилари учун якуний давлат аттестациясини ўтказишнинг барча босқичлари, баҳолаш мезонлари ва тартиб-таомиллари батафсил ёритилган.

Ушбу қўлланма икки асосий қисмдан иборат: олий таълим ташкилотлари битирувчиларининг якуний давлат аттестацияси ва касбий таълим ташкилотлари битирувчиларининг якуний давлат аттестацияси. Ҳар бир бўлим амалий мисоллар, жараёнлар схемалари ва баҳолаш мезонлари билан бойитилган, бу эса фойдаланувчиларга ҳуқуқий ва амалий жиҳатдан тўлиқ қўлланма сифатида хизмат қилади.

Услубий қўлланма фойдаланувчилар учун қулай тарзда тузилган бўлиб, ҳар бир қоидани амалий мисоллар билан тушунтиради. Бу битирувчилар ва мутахассисларга аттестацияни самарали ва ишончли ўтказишда ёрдам беради.

Мазкур қўлланма “Юридик кутубхона” – Yurkitob.uz тизими орқали кенг жамоатчиликка тақдим этилмоқда. Қўлланма билан қуйидаги ҳавола орқали батафсил танишишингиз мумкин: https://yurkitob.uz/uz/books/117

Рамазон Насриддинов,
“Aдолат” МҲAМ бош маслаҳатчиси