Кўп қаватли уйлар ҳовлиси, маҳалла кўчалари ва бошқа ички йўлларга ўзбошимчалик билан тўсиқлар ўрнатиш ҳолатлари учраб туради. Айрим фуқаролар автомобиллар ҳаракатини чеклаш мақсадида йўлга темир устун, бетон тўсиқ, занжир ёки бошқа қурилмалар ўрнатади. Бироқ бундай ҳаракатлар бошқа йўл ҳаракати иштирокчиларининг эркин ҳаракатланишига халақит бериши мумкин ва қонунчиликда жавобгарликка сабаб бўлади.

Қандай ҳаракатлар ҳуқуқбузарлик ҳисобланади?

Ўзбекистон Республикаси Маъмурий жавобгарлик тўғрисидаги кодексининг 147-моддасига мувофиқ, йўл ҳаракатига қасддан халал бериш, автомобиль йўлларида сунъий нотекисликлар ва тўсиқлар яратиш, шунингдек йўл ҳаракати иштирокчиларининг ҳаракатига тўсқинлик қилувчи ноқонуний тўсиқлар ва бошқа қурилмаларни ўрнатиш маъмурий жавобгарликка сабаб бўлади.

Масалан, ички йўлларга рухсатсиз равишда бетон тўсиқлар, темир устунлар, занжирлар ёки бошқа қурилмалар ўрнатиш, шунингдек автомобиллар ҳаракатини чеклаш мақсадида йўлни ўзбошимчалик билан тўсиб қўйиш ушбу модда доирасида ҳуқуқий баҳоланиши мумкин.

Қандай жарима белгиланган?

Мазкур моддага кўра, йўлларга, йўл иншоотларига ва ҳаракатни тартибга солувчи техник воситаларга шикаст етказиш, йўл ҳаракатига қасддан халал бериш, ноқонуний тўсиқлар ўрнатиш ҳамда йўлларни сақлаш қоидаларини бузиш учун фуқароларга базавий ҳисоблаш миқдорининг 5 баравари, мансабдор шахсларга эса 20 баравари миқдорида жарима солинади.

Ички йўлларга тўсиқ ўрнатиш мумкинми?

Ички йўллардан фойдаланишни чеклаш ёки уларга тўсиқ ўрнатиш масаласи белгиланган тартибда ҳал қилиниши лозим. Йўл ҳаракати иштирокчиларининг ҳаракатига халақит берадиган қурилмаларни ўзбошимчалик билан ўрнатиш мумкин эмас. Бунда тўсиқнинг қаерга ўрнатилгани, уни ўрнатиш учун рухсат мавжудлиги ва ҳаракатга қай даражада халал бераётгани ҳуқуқий баҳолашда муҳим аҳамиятга эга.

Хулоса

Демак, маҳалла, турар жойлар ҳудуди ёки бошқа ички йўлларга ўзбошимчалик билан тўсиқ ўрнатиш фуқароларнинг эркин ҳаракатланишига халақит бермаслиги керак. Йўл ҳаракатига ноқонуний равишда тўсқинлик қилган шахслар МЖтКнинг 147-моддасига асосан маъмурий жавобгарликка тортилиши мумкин.

Феруз Жўраев