Ҳар бир давлатнинг ўз тараққиёт йўли ва мустақил ривожланиш стратегияси бўлганидек, унинг ҳуқуқий пойдевори - Конституцияси ҳам мавжуд. Конституция давлатнинг асосий қонуни бўлиб, у мамлакатнинг сиёсий, иқтисодий ва ижтимоий тузилишини, фуқароларнинг ҳуқуқ ва эркинликларини, давлат органларининг тузилиши ва ваколатларини белгилаб беради.

Конституция - бу оддий қонун эмас, балки барча қонунларнинг онаси, ҳуқуқий манбаи ҳисобланади. У жамиятнинг барча соҳаларида амал қиладиган асосий тамойилларни ўзида мужассам этган. Конституцияда инсон ҳуқуқлари, эркинликлари ва манфаатлари энг олий қадрият сифатида эътироф этилган.

Мамлакатимиз Конституцияси халқимизнинг кўп асрлик тарихий тажрибаси, миллий қадриятлари ва умуминсоний тамойилларга асосланган. У фуқароларнинг тенг ҳуқуқлилигини, сўз, виждон ва диний эътиқод эркинлигини, шахснинг дахлсизлигини, мулк ҳуқуқини кафолатлайди.

Ўзбекистон Республикаси Конституцияси 1992 йил 8 декабрда Олий Кенгашнинг ўн иккинчи чақириқ ўн биринчи сессиясида қабул қилинган. Бу тарихий воқеа Ўзбекистоннинг мустақил давлат сифатида шаклланишида муҳим босқич бўлди.

Конституцияни тайёрлаш жараёни 1990 йилда бошланган. Махсус комиссия тузилиб, у икки йил давомида лойиҳа устида ишлади. Лойиҳа кенг жамоатчилик муҳокамасига қўйилди, унда турли соҳа мутахассислари, олимлар, ҳуқуқшунослар ва оддий фуқаролар иштирок этди.

Конституция лойиҳаси умумхалқ муҳокамасидан сўнг такомиллаштирилди ва ниҳоят, 1992 йил 8 декабрда қабул қилинди. Шу кундан бошлаб 8 декабрь Ўзбекистонда Конституция куни сифатида нишонланади.

Шунингдек, 2023 йил 30 апрель куни ўтказилган референдумда янги таҳрирдаги Ўзбекистон Республикаси Конституцияси иштирок этган фуқароларнинг 90,21 фоизи томонидан ёқлаб овоз бериш орқали қабул қилинганлиги унда халқимизнинг Янги Ўзбекистонни барпо этиш бўйича орзу-умидлари ва интилишлари ўз аксини топганлигидан далолат бермоқда.

Янги таҳрирдаги Конституция Янги Ўзбекистон стратегиясини амалга оширишнинг сиёсий-ҳуқуқий асосларини яратиб, миллий давлатчилик тараққиётининг тарихий муҳим босқичида давлат ва жамиятни янада ривожлантиришнинг устувор йўналишларини белгилаб берди.

Бош қомусимиз давлат ҳокимиятининг қонун чиқарувчи, ижро этувчи ва суд ҳокимиятига бўлиниш принципини мустаҳкамлаб қўйган. Бу эса ҳокимият органлари фаолиятининг самарадорлигини таъминлаш ва уларнинг ўзаро назоратини амалга ошириш имконини беради.

Конституция - бу жамият тараққиётининг ҳуқуқий кафолати, барқарорлик ва фаровонлик гаровидир. Шу сабабли ҳам биз уни "Бош қомусимиз" деб улуғлаймиз ва унинг талабларига оғишмай амал қиламиз.

 

Муборакхон Тожиева,
Адлия вазирлиги масъул ходими