Урганч халқаро аэропортида олий мартабали меҳмонни президент Шавкат Мирзиёев шахсан кутиб олди.

Ўзбекистон президенти Шавкат Мирзиёевнинг таклифига биноан Қозоғистон президенти Қосим-Жўмарт Тўқаев 5 апрел куни ташриф билан мамлакатимизга келди.

Икки давлат байроқлари билан безатилган Урганч халқаро аэропортида олий мартабали меҳмонни давлатимиз раҳбари кутиб олди.

Миллий қўшиқ ва рақслардан иборат тантанали маросим бўлди.

Бугун етакчилар музокаралар ўтказади ва қадимги Хива шаҳрининг тарихий обидалари билан танишади.

Ташрифдан кўзланган мақсад ўзаро товар айирбошлаш ҳажмини кўпайтириш, иқтисодиётнинг муҳим тармоқларида кооперация алоқаларини ривожлантириш, транспорт ва энергетика соҳаларида инфратузилмавий лойиҳаларни амалга ошириш, гуманитар дастурларни фаоллаштириш ҳисобланади.

Бундан ташқари, ушбу ташриф доирасида давлат раҳбарлари минтақавий кун тартибидаги масалаларни ҳам муҳокама қиладилар.