Шаҳарсозлик соҳасида қурилиш объектларини лойиҳалаш, қуриш, реконструкция қилиш ва фойдаланишга топшириш жараёнида қонунчиликда белгиланган талабларга риоя этилиши шарт. Ушбу талабларни бузиш, ваколатли органларнинг қонуний кўрсатмаларини бажармаслик ёки қурилиш ишларини белгиланган тартибга зид равишда амалга ошириш Маъмурий жавобгарлик тўғрисидаги кодекснинг 99-моддасига мувофиқ маъмурий жавобгарликка сабаб бўлади.

Қайси ҳолатлар учун маъмурий жавобгарлик белгиланган?

Маъмурий жавобгарлик кодексининг 99-моддасига мувофиқ қурилиш-монтаж ишларини амалга оширишда шаҳарсозлик талабларини бузиш, Қурилиш ва уй-жой коммунал хўжалиги соҳасида назорат қилиш инспекциясининг қонуний кўрсатмаларини бажармаслик, лойиҳа ташкилотининг ўз мажбуриятларини тўлиқ адо этмаслиги, қурилиш материалларини техник регламентларга зид ҳолда ишлаб чиқариш, шунингдек қурилиши тугалланган объектларни фойдаланишга қабул қилиш қоидаларини бузиш ҳуқуқбузарлик сифатида баҳоланади.

Қонунчиликка зид қурилиш ишлари қандай ҳолатларда содир этилади?

Қонунчиликда қурилиш тақиқланган ёки чекланган ҳудудларда қурилиш ишларини амалга ошириш, аҳоли пунктларининг тасдиқланган бош режаларига зид равишда бинолар ва иншоотларни қуриш ёки реконструкция қилиш, шунингдек ваколатли назорат органларини хабардор қилмасдан ёки объектни белгиланган тартибда рўйхатдан ўтказмасдан қурилиш ишларини бошлаш ҳам маъмурий жавобгарликка сабаб бўлади.

Экспертиза хулосаси ва инклюзив муҳит талабларига риоя қилиш нима учун муҳим?

Айрим объектларни қуришда эксперт ташкилотининг ижобий хулосаси олиниши мажбурий ҳисобланади. Бундай хулосасиз қурилиш ишларини амалга ошириш қонунчилик талабларини бузиш ҳисобланади. Шунингдек, шаҳарсозлик ҳужжатларида ногиронлиги бўлган шахслар учун қулай шарт-шароитлар яратишга оид талабларни инобатга олмаслик ёки шундай шароитлар яратилмаган объектларни фойдаланишга рухсат бериш ҳам маъмурий жавобгарликка сабаб бўлади.

Хулоса

МЖтКнинг 99-моддаси шаҳарсозлик соҳасида қонунийликни таъминлаш, қурилиш ишларининг сифатини ошириш ҳамда инсонлар ҳаёти ва хавфсизлигини муҳофаза қилишга қаратилган муҳим ҳуқуқий норма ҳисобланади. Мазкур модда қурилиш жараёнининг барча босқичларида белгиланган талабларга риоя этишни таъминлаш билан бирга, ҳуқуқбузарликларнинг олдини олиш ва шаҳарсозлик соҳасида масъулиятни кучайтиришга хизмат қилади.

Зиёвуддин Намозов