Қонунчиликка кўра, ижтимоий жамғармалар ҳисобидан ногиронлиги бўлган шахснинг ва таркибида ногиронлиги бўлган шахс бор оиланинг электрон онлайн-аукцион орқали ер участкасини сотиб олиш билан боғлиқ харажатларини қоплаш ёрдами кўрсатилади.

Бунда ер участкасини аукцион орқали сотиб олиш харажатлари миқдори базавий ҳисоблаш миқдорининг 100 бараваригача бўлганда тўлиқ, харажатлар миқдори ушбу чегарадан юқори бўлган ҳолларда эса — харажатларнинг базавий ҳисоблаш миқдорининг 100 бараваригача бўлган қисми қоплаб берилади.

Ижтимоий ёрдамни тақдим этиш талаблари ва шартлари қуйидагилардан иборат:

— охирги 12 ой давомида ўзи ёки оила аъзолари номида яшаш учун мўлжалланган турар жойи ёки ер участкаси мавжуд бўлмаслиги;

— ер участкаси охирги уч ой ичида аукцион орқали харид қилинган ва Ўзбекистон Республикаси ҳудудида бўлиши;

— қонунчилик ҳужжатларида белгиланган тартибда тиббий-ижтимоий эксперт комиссиялари томонидан экспертиза натижалари бўйича ногиронлиги бўлган шахс деб топилган, шунингдек, Камбағал оилалар рейестрига киритилган бўлиши.

Ёрдам олувчи шахсларга бир марталик тўлов 14 — 30 ёшдаги шахслар учун “Ёшлар дафтари” жамғармаси маблағлари, 30 ёшдан катта бўлган хотин-қизлар учун “Аёллар дафтари” жамғармаси маблағлари, бошқа эҳтиёжманд шахслар учун “Саховат ва кўмак” жамғармаси маблағлари ҳисобидан молиялаштирилади.

Шунингдек, Камбағал оилалар рейестрига киритилган, бироқ “Аёллар дафтари” ва “Ёшлар дафтари”га киритилмаган шахслар хотин-қизлар фаоли ёки ёшлар етакчиси томонидан бир ой муддатда “Аёллар дафтари” ёки “Ёшлар дафтари”га киритилади ҳамда уларга бир марталик тўлов амалда оширилади.