Меҳнат шартномасида тарафларнинг шахсини аниқлаш ва уларнинг ҳуқуқ ҳамда мажбуриятларини аниқ белгилаш мақсадида мажбурий реквизитлар кўрсатилиши лозим. Меҳнат кодексининг 107-моддасига мувофиқ, шартномада аввало унинг тузилган санаси, жойи, рақами ҳамда тарафларга оид асосий маълумотлар қайд этилади. Бу талаб меҳнат шартномасининг расмий ҳужжат сифатида ҳуқуқий кучга эга бўлишини таъминлайди.

Мазкур модда ходимга доир реквизитларни алоҳида белгилайди. Жумладан, ходимнинг фамилияси, исми ва отасининг исми, шахсини тасдиқловчи ҳужжат маълумотлари, яшаш ёки турган жойи манзили, алоқа воситалари, шахсий идентификация рақами ҳамда жамғариб бориладиган пенсия ҳисобварағи рақами кўрсатилади. Ушбу маълумотлар ходимни аниқ идентификация қилиш, ижтимоий ҳимоя ва меҳнат стажини тўғри юритиш учун зарур ҳисобланади.

Шунингдек, иш берувчининг реквизитлари ҳам тўлиқ акс эттирилиши шарт. Бунда ташкилотнинг номи ёки алоҳида бўлинма номи, вакилнинг маълумотлари ва ваколатини тасдиқловчи асос, жойлашган манзил, солиқ тўловчининг идентификация рақами, банк реквизитлари ҳамда алоқа маълумотлари кўрсатилади. Бу талаб иш берувчининг жавобгарлигини аниқлаштириш ва ҳуқуқий муносабатларда шаффофликни таъминлашга хизмат қилади.

Қонунчиликка кўра, реквизитлардан бирортаси шартномага киритилмаганлиги меҳнат шартномасини тузилмаган деб топиш ёки уни бекор қилиш учун асос бўла олмайди. Бундай ҳолларда етишмаётган маълумотлар ёзма қўшимча келишув орқали тўлдирилади ва у шартноманинг ажралмас қисми сифатида эътироф этилади. Бу норма ходимнинг меҳнат ҳуқуқларини асоссиз равишда чекланишидан ҳимоя қилади.

Бундан ташқари, тарафларнинг реквизитлари ўзгарган тақдирда, улар уч иш куни ичида бу ҳақда ёзма равишда бир-бирини хабардор қилиши шарт. Мазкур мажбурият келгусида юзага келиши мумкин бўлган ҳуқуқий низоларнинг олдини олишга қаратилган.