Солиқ мажбурияти бўйича даъво қилиш муддати 5 йилдан 3 йилга туширилади. Бу кеча, 4 сентябрь куни Президент Шавкат Мирзиёев томонидан қабул қилинган “Ўзбекистон Республикаси Президентининг тадбиркорлар билан 2023 йилдаги очиқ мулоқотида белгиланган вазифаларни амалга ошириш чора-тадбирлари тўғрисида”ги қарорда назарда тутилган. Унга кўра, камерал солиқ текширувини ўтказишда қуйидагилар тақиқланади:

• солиқ тўловчининг ҳудудига кириш;
• солиқ тўловчининг ҳудудини ва биноларини кўздан кечириш;
• солиқ тўловчининг ҳужжатларини талаб қилиб олиш ва уни чақиртириш;
• солиқ тўловчининг ҳужжатлари ва буюмларини олиб қўйиш.

Шуннингдек, 2024 йил 1 январдан бошлаб қуйидагилар кучга киради:

• иқтисодий судлар томонидан солиқ органлари иштирокида кўрилаётган ишлар маъмурий судлар юрисдикциясига ўтказилади;
• солиқ мажбурияти бўйича даъво қилиш муддати 5 йилдан 3 йилга туширилади.
• аҳоли ва тадбиркорларга ажратилган кредитлар бўйича қарздорликни ундириш бўйича суднинг ҳал қилув қарори чиқарилганда, мазкур кредитлар бўйича фоизлар неустойка ҳисобланиши тўхтатилади;
• тўлов миқдори кредит мажбуриятларини бажариш учун етарли бўлмаганда, маблағларни биринчи навбатда мутаносиб равишда муддати ўтган асосий қарз ва фоиз қарздорликларини, иккинчи навбатда жорий тўлов учун ҳисобланган фоизлар ва асосий қарзни, кейинги навбатларда неустойка ва ижро харажатларини қўллашга йўналтириш тартиби ўрнатилади.