Тошкент шаҳар ҳокимининг транспорт воситаларининг пулли тўхтаб туриш жойларини такомиллаштириш бўйича қарори эълон қилинди. 

Қарорга кўра, ҳокимлик ва "Тошкент Инвест компанияси" акциядорлик жамиятининг транспорт воситаларининг пулли тўхтаб туриш жойлари фаолиятини янада такомиллаштириш ҳамда уларни босқичма-босқич ташкил этиш тўғрисидаги таклифлари маъқулланди.

Унга кўра, Тошкент шаҳрида транспорт воситаларининг пулли тўхтаб туриш жойларидан фойдаланганлик учун тўловлар миқдорлари тасдиқланди.

Унга кўра, автотураргоҳнинг бир соати учун:

— 1-тариф зонаси 12000,00
— 2-тариф зонаси 10 000,00
— 3-тариф зонаси 8 000,00
— 4-тариф зонаси 6 000,00
— 5-тариф зонаси 5 000,00 қилиб белгиланди.

Биринчи зона шаҳар марказини ва тўхташ жойларига бўлган эҳтиёж юқори бўлган энг тирбанд ҳудудларни қамраб олади.

Қолган зоналар қуйидагича тақсимланади:

Иккинчи зона марказга яқин, марказдан бироз узоқда жойлашган, аммо машиналар учун ҳали ҳам талаб мавжуд ҳудудларни қамраб олади.

Учинчи зонага шаҳар марказидан ўртача масофада жойлашган ҳудудлар киради.

Тўртинчи зона марказдан узоқда жойлашган, тўхташ жойлари зичлиги камайган ҳудудларни қамраб олади.

Бешинчи зона – бу энг чекка ва кам гавжум ҳудудлар, одатда шаҳарнинг чеккасида жойлашган.

Паркингдан фойдаланганлик учун қуюдаги шахслар бепул фойдаланадилар:

• фавқулодда вазиятлар ва махсус хизматлар фаолиятини амалга ошириш учунфойдаланиладиган жигарранг, қизил ёки кўк-қизил милтилловчи чироқ ва махсусовозли сигналлар билан жиҳозланган транспорт воситалари;
   
• олд ва орқа ойналарида “7.17” йўл белгиси тасвири туширилган I ёки II гуруҳ ногиронлиги бўлган ногиронларнинг транспорт воситалари (жумладан, ногиронлар учун мўлжалланган махсус транспорт воситалари);
   
• II Жаҳон уруши қатнашчисининг транспорт воситаси;
   
• давлат рўйхатидан ўтказилмайдиган икки ғилдиракли транспорт воситалари.

Бундан ташқари паркингда, шу жумладан савдо корхоналари, хизмат кўрсатиш, тиббиёт, спорт ва маданий-кўнгилочар муассасалар ёнидан камида 5 фоиз жой (лекин бирдона жойдан кам бўлмаган) имтиёзли рухсатномага эга бўлган шахслар томонидан бошқариладиган транспорт воситаларини бепул жойлаштириш учун ажратилади.