Ўзбекистонда қарийб 2,4 миллиондан ортиқ хонадонларда кадастр ҳужжатлари йўқ. Бу ҳақда Сенат қўмитаси мажлисида маълум қилинади. Мажлисда кадастр соҳасида аҳоли мурожаатлари билан ишлаш ва муаммоли масалаларни ҳал қилиш зарурлиги муҳокама қилинган. Шунингдек, аҳоли томорқа учун кредит, субсидия ҳамда уй-жойини кенгайтиришга ипотекадан фойдалана олмаётгани сабаби сифатида Республика ҳудудидаги 2 миллион 400 мингдан ортиқ аҳоли хонадонларининг кадастр ҳужжатлари йўқлиги ва бино-иншоотларига нисбатан мулк ҳуқуқини белгиловчи тартиб мавжуд эмаслиги билан изоҳланди. Шу туфайли агентликка ҳамда Халқ қабулхоналарига мурожаатлар сони кўпайган. "Таҳлил натижаларига кўра, айни шу мазмундаги мурожаатлар жами мурожаатларнинг 40 фоиздан ортиғини ташкил этади”, — дея қўшимча қилинади Сенат ахборот хизмати хабарида. Маълум қилинишича, жорий йилнинг ўтган даврида Кадастр агентлигининг ҳудудий бошқармаларига жисмоний ва юридик шахслар юборган мурожаатларни кўриб чиқишда раҳбар ва масъул ходимлар томонидан камчилик ва қонунбузарликларга йўл қўйилгани аниқланган. Оқибатда масъулларга нисбатан 10 та жарима ва 78 та ҳайфсан, 1 та лавозимдан озод этиш, жами 89 та интизомий жазо чоралари қўлланилган.