Жорий йилнинг 15 cентябрь куни Сенатнинг Ёшлар, маданият ва спорт масалалари қўмитаси томонидан ташкил этилган семинарда Оилавий болалар уйлари фаолияти ҳамда “Меҳр дафтари” жамғармаси маблағларининг мақсадли сарфланиши юзасидан депутатлик назоратини ўрнатиш масалалари муҳокама қилинди. Семинарда қайд этилишича, Меҳрибонлик муассасалари фаолияти ислоҳ қилиш бўйича олиб борилган ишлар натижасида 23 та Меҳрибонлик муассасаси ва болалар уйининг фаолияти тугатилган, шундан 14 таси Меҳрибонлик уйи, 4 таси болалар шаҳарчаси ва 5 таси болалар уйи ҳисобланади. Келтирилишича, етим болалар ва ота-она қарамоғидан маҳрум бўлган болаларнинг муаммоларини ўрганиш ҳамда ҳал этиш, уларнинг орзу-истакларини рўёбга чиқаришга кўмаклашиш мақсадида “Меҳр дафтари” тизими амалиётга жорий этилган. “Меҳр дафтари” платформаси ишга туширилиб, бугунги кунда унга 8 921 нафар (4610 нафар ўғил ва 4311 нафар қиз) бола киритилган, 4 452 нафар боланинг муаммолари ўрганилиб, 3 171 нафар боланинг масаласи ижобий ҳал этилган. Маълум қилинишича, уй-жойга муҳтож етим болалар ва ота-она қарамоғидан маҳрум бўлган 406 нафар боланинг 388 нафарига уй-жойлар берилган.