2017 йил 31 октябрь куни Нью-Йоркда теракт амалга ошириб, 8 кишини ўлимига сабабчи бўлган ўзбекистонлик Сайфулло Соипов АҚШ округ суди томонидан 8 марта умрбод ва 260 йилга озодликдан маҳрум қилинди. Бу ҳақда АҚШ Адлия департаменти хабар қилди. 17 май куни Нью-Йорк суди Соипов айбланаётган 28 та банд бўйича мумкин бўлган энг оғир жазоларни тайинлади. Унга кўра, собиқ ИШИД аъзосига 8 нафар одамни ўлимига сабаб бўлгани учун 8 марта умрбод ва 18 нафар, жумладан, 4 нафар болаларни ўлдиришга қасд қилгани учун 260 йилга озодликдан маҳрум этиш жазоси тайинланди. Соипов Сайфулла Хабибулаевич 1988 йил 8 февралда Тошкентда туғилган. 2005 йилда касб-ҳунар коллежини тамомлаган, 2005−2009 йилларда Тошкент молия институтида таълим олган. ОТМни тамомлаганидан сўнг пойтахтдаги «Саёҳат» меҳмонхонасида бухгалтер лавозимида ишлаган. АҚШга кетгунига қадар жиноий жавобгарликка тортилмаган ва ҳуқуқни муҳофаза қилиш органлари эътиборига тушмаган. 2010 йилда Соипов грин-карта лотереясини ютиб олади ва шу йилнинг ўзида АҚШга кетади. Сўнгги бир неча йил давомида у АҚШда вақтинча яшаб келаётган Ўзбекистон фуқароси бўлган аёл билан шаръий никоҳда бўлган. Ўтган вақт ичида Соипов бирор марта Ўзбекистонга келмаган ва Тошкентда яшаётган ота-онаси билан учрашмаган. АҚШда бўлиб турган вақтда Соипов Ўзбекистон дипломатик ваколатхоналарида консуллик рўйхатида турмаган. «Сайфулло Соипов АҚШга борганидан сўнг одамови бўлиб қолган, радикал гуруҳлар таъсирига тушган. Бу ҳақда Америка ОАВлари ҳам уни таниган одамларга таяниб хабар қилмоқда», — дея қайд этилганди 2017 йилда эълон қилинган Ўзбекистон ТИВ ҳузуридаги «Жаҳон» Ахборот агентлиги (ҳозирги «Дунё» АА) хабарида. Соипов ҳужумни ижарага олинган юк машинасида қилган. У Нью-Йорк марказидаги кўчада ёппасига 20 кишини босиб кетган. Жароҳатланганлар орасида тана аъзоларидан айрилган, руҳан ва жисмонан ногирон бўлиб қолганлар, хусусан, 14 ёшли ўсмир бор.