Таъкидлаш жоизки, меҳнатга лаёқатсизлик варақасини расмийлаштиришнинг эскича услуби сақланиб қолган. Қонунчиликка кўра, меҳнатга лаёқатсизлик варақаларини бериш тартиби тўғрисидаги йўриқномага мувофиқ, меҳнатга лаёқатсизлик варақалари ёки маълумотномалари пасспорт ёки идентификация ID-картаси асосида, тузатиш ва қисқартиришларсиз, кўк ёки қора рангли ручкада расмийлаштирилади. Меҳнатга лаёқатсизлик варақалари ёки маълумотномаларини қоғоз бланкларда ва ручкада ёзиш, қўлда ҳисоблаш, сақлаш ишлари соғлиқни сақлаш тизими ва бошқа даволаш профилактика муассасаларининг замон талабларига мослашмаганлигини кўрсатиб, ортиқча иш ҳажми, қўшимча харажат ва оворагарчиликни кўпайтиради. Биргина 2022 йил учун Соғлиқни сақлаш вазирлиги томонидан меҳнатга лаёқатсизлик варақалари бланкларини тайёрлашга давлат бюджетидан 346,5 млн. сўм ажратилган. Ахборот инфратузилмаларининг ривожланиши меҳнатга лаёқатсизлик варақаларини электронлаштириш, ягона интеграциялашган тизимда рўйхатга олиш, тўғридан-тўғри беморнинг иш жойига юбориш тартибини яратишни тақозо этади. Электрон меҳнатга лаёқатсизлик варақалари фуқароларнинг тиббиёт муассасаларига бир неча маротаба шахсан бориши, варақани иш жойига топширишда дуч келадиган оворагарчиликларига барҳам беради. Шунингдек, электрон меҳнатга лаёқатсизлик варақаларининг юритилиши сохталаштириш, шикаст етказиш, йўқотиш каби муаммоларнинг олдини олади. Хорижий мамлакатлардан Россия Федерациясида меҳнатга лаёқатсизлик варақаларини электронлаштириш биринчи маротаба 2017 йил 1 майдаги 86-ФЗ сонли Федерал Қонуни асосида тартибга солинган. 2021 йилнинг ноябрида меҳнатга лаёқатсизлик варақалари тўлиқ электронлаштирилиб автомат тўлов ҳисобланишига оид ҳукумат қарори қабул қилинган, 2022 йил 1 январдан эса, қоғоз шаклидаги касаллик варақаларини бериш тартибининг фақат айрим турлари белгиланиб, бошқа ҳолатларда электрон расмийлаштириш лозимлиги белгиланди.

• Маълумот учун: Россияда рақамли блютенни расмийлаштиришда даволовчи шифокор махсус дастурда ўз иш компьютеридан электрон меҳнатга лаёқатсизлик варақасини тўлдиради ва унинг рақамини беморга хабар қилади. Меҳнатга лаёқатсизлик варақасини шифокор электрон рақамли имзо билан тасдиқлайди. Иш берувчи ходимга маълум қилинган рақам ёрдамида ахборот алмашинув тизими (ФСС – Фонд социаьного страхования) орқали электрон меҳнатга лаёқатсизлик варақаларини кўриш имкониятига эга бўлади ва маълумотлар тўғридан–тўғри иш берувчининг бухгалтерия тизимига юкланади. Маълумотлар «Социальный навигатор» иловаси ёрдамида ҳам олиниши мумкин.
• Шунингдек, Буюк Британия, Германия, Полша, Литва, Эстония, Чехия давлатларида ҳам меҳнатга лаёқатсизлик варақаларининг рақамлаштирилганлигининг гувоҳи бўлиш мумкин.

• Германияда 2022 йилнинг июль ойидан меҳнатга лаёқатсиз маълумотномаларининг (варақа) рақамли нусхасини суғурта компаниясига онлайн жўнатилиши белгиланди, 2023 йилдан эса, маълумотлар иш берувчига ҳам рақамли кўринишда етказилади. Полшада меҳнатга лаёқатсизлик варақаларини электрон тизимга ўтказиш 2016 йилнинг январида бошланиб, 2018 йил 1 декабрдан фақатгина электрон шаклда тузилиши белгиланган. Литвада электрон меҳнатга лаёқатсизлик варақаси 2010 йилдан тизимга синов тариқасида киритилган. Чехия Республикасида 2020 йилнинг 1 январидан меҳнатга лаёқатсизлик варақаларини расмийлаштиришнинг қоғоз шаклидан электрон кўринишига ўтилган.

Маълумот учун: Хорижий давлатларда рақамли меҳнатга лаёқатсизлик варақалари тизимига ўтишда қоғоз ҳамда электрон блютенлар маълум муддатга қадар бир хил юридик аҳамият касб этган.