Бир неча кундан бери Тбилиси марказида вазият кескинлашиб турибди. Бу ерда Грузия парламенти биринчи ўқишда маъқуллаган Хорижий агентларни рўйхатга олиш тўғрисидаги қонунга қарши оммавий норозилик намойишлари бўлиб ўтмоқда. Бугун эса Грузиянинг ҳукмрон партияси «Грузия орзуси» парламентдаги кўпчилик партиялар қатори оммавий норозилик намойишлари ва хавфсизлик кучлари ўртасидаги тўқнашувлардан сўнг «хорижий агентлар» тўғрисидаги мунозарали қонун лойиҳасидан воз кечишини айтди. Бу ҳақда Reuters агентлиги ушбу партия вакилларига таяниб хабар бермоқда. Февраль ойида Грузия парламентида хорижий агентлар тўғрисидаги қонун лойиҳасининг иккита варианти - Грузия ва Америка рўйхатга олинган эди. Ҳужжатнинг грузинча вариантига кўра, молиялаштиришнинг 20 фоиздан кўпроғи чет элдан келган юридик шахс хорижий таъсир агенти ҳисобланиши керак. Ҳужжатга кўра, ОАВ ҳам чет эл агенти бўлиши мумкин, бунда ташаббус жисмоний шахсларга тааллуқли эмас. Америка версияси нафақат юридик шахсларга, балки жисмоний шахсларга ҳам тегишли, у жиноий жавобгарликни ҳам ўз ичига олади. Намойишчилар қонун лойиҳасини парламентдан қайтариб олишни ва бир кун аввал ҳибсга олинганларнинг ҳаммасини озод қилишни талаб қилишди. Қонун лойиҳасига кўра, хориждан молиялаштирилган ҳар қандай ташкилот «хорижий агент» сифатида расман рўйхатдан ўтишини талаб қилади – ҳатто «агент»нинг хорижий даромади уларнинг бюджетининг бешдан бир қисмини ташкил этса ҳам. Ҳар қандай сабабга кўра буни қилмаганлар катта жаримага тортилади. Фуқароларнинг норозилигига сабаб қонун, уларнинг фикрича, Грузиянинг Европа интеграциясига тўсқинлик қилмоқда. АҚШнинг маҳаллий элчихонасининг айтишича, қонун «Кремлдан илҳомланган». «Грузия орзуси» партияси Кремль билан ҳаддан ташқари дўстона муносабатда бўлиб, сўнгги йилларда мамлакатни авторитаризм сари етаклагани айтилади. Ижтимоий тармоқларда намойишчилар парламент биноси ойналарини синдиришга уринаётгани, полиция ва махсус кучлар сув пуркагичлар, шовқинли гранаталар ва кўздан ёш оқизувчи газдан фойдалангани акс этган видеолавҳалар пайдо бўлди. https://youtu.be/ICsBtNHGq68 Махсус кучлар парламент яқинидаги майдон ва унинг атрофидаги кўчалардан намойишчиларни сиқиб чиқаришга киришган. Гувоҳларнинг айтишича, пойтахт марказида кўп сонли махсус кучлар ва полиция кезиб юрибди. Грузия матбуоти намойишчилар орасида газ, тутун ва одамлар махсус кучлардан қочганида пайдо бўлган тиқилинч қурбонлари, кўплаб ҳибсга олинганлар ҳақида ёзмоқда.