САВОЛ. Хусусий университетда ўқийман. Ўқишимни давлат ОТМларидан бирига кўчирмоқчи эдим. Бунинг иложи борми? ЖАВОБ. Қонунчиликка кўра, талабалар ўқишини республикада фаолият юритаётган хорижий ва нодавлат олий таълим ташкилотларидан: давлат олий таълим муассасаларининг мос ва турдош бўлмаган таълим йўналишларига тегишли бакалавриат таълим йўналиши учун белгиланган табақалаштирилган тўлов-контрактнинг минимал миқдорига тенг бўлган бир марталик тўлов асосида кўчиради. Давлат олий таълим муассасаларининг мос ва турдош таълим йўналишларига кўчиришда:

• талабадан алоҳида иқтидор талаб этиладиган таълим йўналишлари бўйича касбий (ижодий) имтиҳонлар, бошқа таълим йўналишлари бўйича тест синовлари ўтказилади.
• Бунда, касбий (ижодий) имтиҳонлар тегишли олий таълим муассасаси томонидан, тест синовлари Давлат тест маркази томонидан ўтказилади;
• тест синовлари ва касбий (ижодий) имтиҳонлар бўйича ўтиш баллари ҳар йили 15 июлга қадар Олий ва ўрта махсус таълим вазирлиги ҳамда тизимида олий таълим муассасалари бўлган вазирлик ва идоралар томонидан белгиланади ҳамда Давлат тест марказининг расмий веб-сайтида эълон қилинади;
• ўтиш балидан паст балл тўплаган талабалар бакалавриатга қабул қилишдаги тартибга мувофиқ табақалаштирилган тўлов-контракт асосида ўқишга қабул қилинади;
• тест синовлари ва касбий (ижодий) имтиҳонлар натижалари Давлат тест маркази ҳамда тегишли олий таълим муассасасининг расмий веб-сайтларида эълон қилинади.

Шундай экан юқоридаги талаблар асосида хусусий ОТМдан давлат ОТМсига ўқишни кўчириш мумкин.

Саволга ҳуқуқшунос Нуриддин Худойбердиев жавоб берди.