Токио хорижий тиллар университети кичик илмий ходими Хидака Шинсуке “New Express + Uzbek language” номли ўқув қўлланма яратди. Бу ҳақда “Дунё” АА хабар берди.  

Қўлланма 160 саҳифадан иборат бўлиб, лотин ёзувида ёзилган. Китоб ўзбек тилини бошловчиларга грамматика асосларини ўзлаштириши учун 20 та бошланғич даражадаги дарсларни ўз ичига олади. Шу билан бирга, ўқувчиларга оғзаки сўзлаш кўникмаларини шакллантириш мақсадида китобнинг овозли шакллари ҳам тайёрланган.

Хидака Шинсукенинг таъкидлашича, ўқувчилар дарсликни тугатгандан сўнг, бемалол Ўзбекистонда таржимонсиз саёҳат қилишлари ва бизнес ташрифларини амалга оширишлари мумкин.

Китоб 29 январдан бошлаб сотувга чиқарилади.

Маълумот учун, Хидака Шинсуке 2007 йилдан буён ўзбек тилини ўрганиб келмоқда. 2014–2016-йилларда Ўзбекистон Фанлар академиясида илмий изланишлар олиб борган ҳамда Ўзбекистон давлат жаҳон тиллари университети ва “Ўзбекистон-Япония” марказида япон тилидан дарс берган.