Январь ойи бошида Япония ғарбидаги префектураларида содир бўлган кучли зилзила оқибатида қурбон бўлган ва жароҳатланганлар орасида Ўзбекистон фуқаролари йўқ, деб хабар бермоқда "Дунё" АА.

"Ўзбекистон дипломатлари Япониянинг тегишли идоралари билан доимий алоқада бўлиб турибди", дейилади хабарда.

Маълумот учун, Япониянинг ғарбий қисмидаги Ното ярим ороли ҳудудида янги йилнинг биринчи кунида кучли зилзилалар рўй берди. Энг кучли ер қимирлаши 7,6 баллни ташкил қилган. 2011 йилдан бери биринчи марта Япониянинг бутун ғарбий қирғоқларига йирик цунами хавф солди. Соҳилнинг баъзи жойларида тўлқин баландлиги 4,2 метрга етган. Оқибатда 1370 дан ортиқ уйлар қисман ёки бутунлай вайрон бўлди, одамлар вайроналар остида қолган бўлиши мумкин. Қурбон бўлганлар сони 200 нафардан ошган.