Давлат раҳбарининг Олий Мажлис ва Ўзбекистон халқига йўллаган Мурожаатномасида мамлакатни ривожлантиришдаги стратегик йўналишлар ва қонун ижодкорлигига оид аниқ таклифлар илгари сурилди.

Президент таъкидлаган устувор вазифалар қаторида маҳалланинг аҳамиятини ошириш, ижтимоий адолатни таъминлаш, камбағалликни қисқартириш, иқтисодиётни инновацион ривожлантириш ҳамда таълим ва инсон капиталига сармояни кучайтириш алоҳида қайд этилди.

Мурожаатномада космик соҳада илк бор сунъий йўлдош учирилиши ва биринчи ўзбек космонавти фазога парвоз қилдириш бўйича амалий ишлар бошлангани ҳам таъкидланди.

Шу билан бирга, “Рақамли стартаплар” дастури кенгайтирилиб, хусусий стартап марказлари ташкил этилади, финтех ва венчур соҳаси ривожлантирилади. Ёшлар замонавий меҳнат бозорида рақобатбардош мутахассислар сифатида тайёрланиши учун касбий таълим тизимига алоҳида эътибор қаратилди.

Мурожаатномада қонунчилик соҳасидаги муҳим ташаббуслар ҳам илгари сурилди: венчур фондлар, финтех ва стартап соҳасини ривожлантириш, иштирокчилар ҳуқуқларини қонунчилик асосида кафолатлаш, “Муқобил инвестиция жамғармалари тўғрисида”ги қонунни ишлаб чиқиш вазифаси белгиланди.

Ҳудудларда Илғор касбий маҳорат техникумлари ва “Касблар шаҳарчаси” ташкил этилиб, ёшлар замонавий ва талаб юқори бўлган касбларга йўналтирилади.

Президент Мурожаатномаси ҳар бир фуқаро, жамият ва давлат органи олдига катта масъулият юклаб, устувор вазифаларни амалга ошириш орқали Янги Ўзбекистон тараққиётини таъминлашда муҳим аҳамият касб этади.

Салоҳиддин  САТТАРОВ,

Самарқанд вилоят адлия бошқармаси бошлиғи