Кўп қаватли уйларда яшовчилар учун иссиқ сув таъминоти жуда муҳим. Қолаверса, айни куз-қиш мавсумида хонадонларнинг иситиш тизимларига ўз вақтида уланиши, ҳақ тўлаш тарифлари, иссиқлик корхонасининг истеъмолчини огоҳлантирмасдан уни иссиқлик таъминотидан узиб қўйиши каби масалалар атрофида доим саволлар айланади. Hudud24.uz қуйида иссиқлик таъминоти билан боғлиқ муҳим саволларга жавоб беради.

1. Иссиқлик энергиясидан фойдаланиш тартиби қандай?

Иссиқлик энергиясидан иссиқлик таъминоти корхонаси ва истеъмолчи ўртасида тузиладиган шартнома асосида фойдаланилади. Бунда истеъмолчининг иссиқлик қурилмалари бевосита ушбу корхонанинг тармоқларига уланган бўлиши лозим. Шартноманинг намунавий шакли Энергетика вазирлиги томонидан тасдиқланади. Унга қонунчиликка зид бўлмаган қўшимча бандлар киритилиши мумкин.

2. Тариф ўзгарса нима бўлади: шартнома бўйича ҳақ тўланадими?

Тариф ўзгарган тақдирда, санасидан қатъи назар, иссиқлик энергиясидан фойдаланиш шартномаси ўз кучида қолади. Истеъмолчи иссиқлик энергияси учун янги тариф жорий этилган кундан бошлаб янги тариф бўйича ҳақ тўлашга мажбур.

3. Иссиқлик тармоғига бошқа истеъмолчиларни уласа бўладими?

Истеъмолчи фақат иссиқлик таъминоти корхонаси билан келишган ҳолда иссиқлик тармоғига бошқа истеъмолчиларни улаши мумкин. Улар билан иссиқлик энергиясидан фойдаланиш бўйича шартнома тузишилади. Бунинг учун Электр энергияси, нефть маҳсулотлари ва газдан фойдаланишни назорат қилиш инспекциясидан рухсат олиш керак. Шундан кейин иссиқлик таъминоти корхонаси бошқа истеъмолчиларни тармоққа улаб беради.

4. Иссиқлик таъминоти корхонасининг истеъмолчини огоҳлантирмасдан уни иссиқлик таъминотидан узиб қўйишга ҳаққи борми?

Иссиқлик таъминоти корхонаси тизимидаги аварияларнинг олдини олиш ва уларни бартараф этиш ёки одамларнинг хавфсизлигини таъминлаш ишларини ўтказиш билан боғлиқ кечиктириб бўлмайдиган чора-тадбирларни кўриш зарур бўлганда аҳолини иссиқлик таъминотидан узиб қўйиши ёки чеклаши мумкин. Бунда истеъмолчи билан келишилмаган ва у огоҳлантирилмаган бўлиши мумкин, бироқ уни дарҳол хабардор қилиш талаб этилади.

5. Хавфсизлик масаласи қандай? Ким назорат қилади?

Иссиқлик энергиясининг оқилона ва самарали ишлаб чиқарилиши, узатилиши ва истеъмол қилиниши, хавфсизлик масалалари устидан Электр энергияси, нефть маҳсулотлари ва газдан фойдаланишни назорат қилиш инспекцияси давлат назоратини олиб боради.

6. Тадбиркорлик субъектлари иссиқлик тармоқларига қандай уланади?

Тадбиркорлик субъектлари ёки туман (шаҳар) қурилиш ва уй-жой коммунал хўжалиги бўлимлари буюртманома бергандан кейин, тадбиркорларга иссиқ сув ва “отопление” иссиқлик таъминоти корхонаси томонидан уч иш кунидан ошмайдиган муддатда берилиши керак.

7. Қурилмаларни ўзгартириш мумкинми?

Иситиш қурилмаларини реконструкция қилиш (ўзгартириш) мумкин. Фақат ўзгартирилгандан кейин ундан фойдаланишга рухсат олиш керак. Бунинг учун қурилмани кўрикдан ўтказиш мақсадида уни Электр энергияси, нефть маҳсулотлари ва газдан фойдаланишни назорат қилиш инспекциясининг ваколатли вакилига тақдим этилади. Иситиш қурилмалари ва иссиқлик тармоқлари фақат Электр энергияси, нефть маҳсулотлари ва газдан фойдаланишни назорат қилиш инспекцияси томонидан берилган рухсатнома мавжуд бўлгандагина ишга туширилиши мумкин.

Т. Азимов,

Адлия вазирлиги масъул ходими