Ҳиндистон пойтахтида жойлашган Жамия Миллия Исламия (ЖМИ) университети ҳудудида мутафаккир ва қомусий олим Абу Райҳон Беруний ҳайкали ўрнатилади. Бу ҳақда “Дунё” агентлиги хабар берди. Қайд этилишича, Ўзбекистон элчиси Дилшод Аҳадов ва университет ректори, профессор Нажма Ахтар ўртасида учрашув бўлиб ўтган. Унда профессор Абу Райҳон Берунийнинг бой илмий меросига юқори баҳо бериб, унинг “Китоб ул-ҳинд” асари Ҳиндистон ҳақида ёзилган илк ноёб илмий асарлардан бири эканини таъкидлаган. Абу Райҳон Беруний ҳайкалини олий билим юртининг ҳуқуқшунослик, хорижий тиллар департаменти, дизайн ва инновация департаменти, араб-ҳинд маданият маркази ва бошқа бўлинмалари туташган гавжум майдончада ўрнатиш режалаштирилмоқда. Ҳайкал университетга Ўзбекистон томонидан тақдим этилади.