Йўл ҳаракати қоидаларини қўпол равишда такроран бузган ҳайдовчилар учун жаримани чегирма билан тўлаш имконияти чекланиши, айрим ҳолатларда эса транспорт воситасини вақтинча олиб қўйиш таклиф этилмоқда.

Олий Мажлис Қонунчилик палатаси йўл ҳаракати хавфсизлигини янада кучайтиришга қаратилган қонун лойиҳасини биринчи ўқишда қабул қилди.

Жаримани чегирма билан тўлаш ҳуқуқи чекланади

Қонун лойиҳасига кўра, айрим қўпол қоидабузарликларни такроран содир этган ҳайдовчилар маълум муддат давомида маъмурий жаримани чегирма билан тўлаш ҳуқуқидан маҳрум этилади.

Бу чора ҳайдовчиларнинг масъулиятини ошириш ва йўлларда интизомни мустаҳкамлашга қаратилган.

Автомобил 6 ойдан 1 йилгача олиб қўйилиши мумкин

Лойиҳада маъмурий жазонинг янги турини жорий этиш ҳам таклиф қилинмоқда.

Унга мувофиқ, қуйидаги ҳолатларда автомототранспорт воситаси 6 ойдан 1 йилгача муддатга вақтинча олиб қўйилиши мумкин:

— йўл безорилиги;

— ноқонуний пойга ташкил этиш ёки унда иштирок этиш;

— транспорт воситасини маст ҳолатда бошқариш;

— мастлик ҳолатини аниқлаш учун текширувдан ўтишдан бўйин товлаш.

Бу чора транспорт воситасини бошқариш ҳуқуқига эга бўлмаган ёки ушбу ҳуқуқдан маҳрум қилинган шахсларга нисбатан суд қарори асосида қўлланилиши назарда тутилмоқда.

Вояга етмаганларга автомобил бериш учун жиноий жавобгарлик

Қонун лойиҳасида яна бир муҳим янгилик таклиф этилган.

Агар транспорт воситасини вояга етмаган шахсга бошқариш учун бериш оқибатида инсонга ўртача оғир ёки оғир тан жароҳати етказилса, одам ҳалок бўлса ёки бошқа оғир оқибатлар келиб чиқса, автомобилни топширган шахс учун жиноий жавобгарлик белгиланиши режалаштирилмоқда.

Яна қандай жавобгарликлар кучайтирилмоқда?

Қонун лойиҳаси билан қуйидаги ҳуқуқбузарликлар учун ҳам алоҳида жавобгарлик назарда тутилган:

— вояга етмаган шахсга транспорт воситасини бошқаришни топшириш;

— автомототранспорт воситалари пойгасини ноқонуний ташкил этиш ва унда иштирок этиш;

— юк транспорт воситасини тунги вақтда хавфли ҳолатда йўл четида қолдириш;

— транспорт воситасини ҳисобдан чиқариш тартибини бузиш;

— белгиланган тезликни 80 км/соатдан ортиқ ошириш.

Қонуннинг асосий мақсади нима?

Депутатлар таъкидлашича, мазкур қонун лойиҳасининг асосий мақсади жазоларни кучайтириш эмас, балки:

— йўл-транспорт ҳодисаларининг олдини олиш;

— ҳайдовчиларнинг масъулиятини ошириш;

— инсон ҳаёти ва соғлиғини ишончли ҳимоя қилиш;

— йўл ҳаракати хавфсизлигини таъминлашдан иборат.

Эслатма: Мазкур қонун лойиҳаси ҳозирча Олий Мажлис Қонунчилик палатаси томонидан биринчи ўқишда қабул қилинган. Унинг кучга кириши учун қонунчилик жараёнининг кейинги босқичларидан ўтиши, Сенат томонидан маъқулланиши ва Президент томонидан имзоланиши талаб этилади.

Феруз Жўраев