Адлия вазирлиги томонидан ишлаб чиқилган «Аҳоли ва тадбиркорларга сервис сифатини ошириш» дастурида давлат хизматларини олишда яна бир қанча қулайликлар бўлиши назарда тутилмоқда. Масалан:

• анъанавий шаклда кўрсатиладиган давлат хизматларини Ягона интерактив давлат хизматлари портали орқали кўрсатишни йўлга қўйиш;
• dxa.gov.uz ахборот тизими орқали ЭРИ калитларини расмийлаштириш ва бериш имкониятини яратиш;
• фуқаролар орасида кенг фойдаланилаётган хизматларни «ягона дарча» тамойили асосида ўзаро боғланган ҳолда кўрсатиш;
• фуқаролар учун ноқулайликлар туғдираётган мавжуд тартибларни мақбуллаштириш;
• никоҳланувчи шахсларнинг тиббий кўрик натижаларини электрон тизим орқали олишни йўлга қўйиш;
• Ўзбекистон фуқароси билан чет элда тузилган никоҳ ва ажримни тизимга киритиш имкониятини яратиш;
• «Юридик ёрдам» ахборот тизимида адвокатлик тузилмалари ва адвокатлар фойдаланиши учун очиқ бўлган ногиронлиги бўлган шахсларнинг мурожаатлари бўлимини яратиш;
• электрон рақамли имзодан фойдаланган ҳолда масофадан туриб амалга ошириладиган нотариал ҳаракатлар турларини кенгайтириш;
• my.gov.uz портали орқали онлайн форматда бўладиган давлат хизматлари ҳақида аҳолини хабардор қилиш.

Мақсад - масофадан туриб мобил иловалар орқали кўрсатиладиган давлат хизматларини кўпайтириш, ундириладиган тўловлар миқдорини камайтириш, талаб қилинадиган ортиқча ҳужжатларни бекор қилиш, кўриб чиқиш жараёнлари ва муддатларини кескин қисқартириш, шаффофликни ошириш, аҳоли ва тадбиркорлар билан доимий мулоқот майдончаларини ташкил этиш, ходимларнинг муомала маданиятини юксалтириш, тезкор ва сифатли хизмат кўрсатишга ўқитишдир.

Жаҳонгир Ҳусанов,

Адлия вазирлиги масъул ходими