Мўғулистон жорий йилда Ўзбекистонда элчихона очишни режалаштирмоқда. Ушбу масала 2023 йил 8 март куни икки мамлакат ТИВ раҳбарлари Бахтиёр Саидов ва Батмунх Батцэцэг учрашувида муҳокама қилинди. Ўзбекистон Ташқи ишлар вазири Бахтиёр Саидов ўз телеграм каналида Мўғулистоннинг Ўзбекистонда элчихонасини очиш қарорини олқишлаши, сўнгги йилларда икки томонлама алоқалар барча соҳаларда ижобий суръат кўрсатаётгани ҳақида ёзди. Вазирлар учрашувида ҳамкорликнинг шартномавий-ҳуқуқий асосларини кенгайтириш, ТИВлараро маслаҳатлашувларнинг навбатдаги даврасини ўтказиш, савдо айланмасини диверсификация қилиш ва қўшма ҳамкорлик лойиҳаларини амалга ошириш бўйича таклифлар муҳокама қилинган. Қишлоқ хўжалиги соҳасида ҳамкорлик бўйича Ўзбекистон-Мўғулистон ишчи гуруҳи ва Ишбилармонлар кенгашини ташкил этиш масалаларини ўрганиш бўйича келишувга эришилган. Аввалроқ, Батцэцэг Ўзбекистон минтақада энг катта аҳоли ва ҳудудга эгалиги, савдо ва транспорт логистикаси ҳам яхши ривожлангани сабабли Ўзбекистонда элчихона очиш орқали Мўғулистон Марказий Осиё давлатлари билан товар айирбошлаш ҳажмини ошириши ҳақида айтган эди.