Сергелида юз берган 12 ёшли қизнинг қотиллиги билан боғлиқ жиноят иши ёпиқ судда кўрилади. Бу ҳақда Олий суд матбуот хизмати маълум қилди. Маълум қилинишича, мазкур иш жиноят ишлари бўйича Яккасарой туман суди томонидан кўриб чиқилмоқда. 1993 йилда Тошкент вилоятида туғилган А. Т. Жиноят кодексининг 97-моддаси (қасддан одам ўлдириш) 2-қисми “в”, “ж”, “з”, “о” бандлари, 104-моддаси (қасддан баданга оғир шикаст етказиш) 2-қисми “в” банди, 118-моддаси (номусга тегиш) 4-қисми, 119-моддаси (жинсий эҳтиёжни зўрлик ишлатиб ғайритабиий усулда қондириш) 4-қисми, 134-моддаси (қабрни таҳқирлаш), 137-моддаси (одам ўғрилаш) 3-қисми “б” банди ва 226-моддаси (маъмурий назорат қоидаларини бузиш) 1-қисмида назарда тутилган жиноятларни содир этганликда айбланмоқда. “Жиноят-процессуал кодексининг 19-моддаси (судда жиноят ишларининг ошкора кўрилиши) талабларига мувофиқ мазкур жиноят иши ёпиқ суд мажлисида кўриб чиқилиб, қўшимча маълумот суд жараёни якуни бўйича берилади”, дейилади хабарда. Аввалроқ Сергелидаги 12 ёшли қизнинг қотиллиги билан боғлиқ тергов иши якунланиб, судга юборилганлиги ҳақида хабар қилинганди. Эслатиб ўтамиз, қонунчиликка кўра, суд ишни кўриб чиқиш бўйича 7 суткада ажрим чиқариши ва шу муддатдан бошлаб 2 ойда ишни кўриб чиқиши керак.