Жорий йилнинг 26 май куни Адлия вазирлиги ташаббуси асосида Беларусь Республикаси Адлия вазирлиги ва Бош прокуратураси ҳузуридаги Қонунийликни мустаҳкамлаш ва ҳуқуқ-тартибот муаммолари илмий-амалий маркази ҳамкорлигида “Норматив-ҳуқуқий ҳужжатларнинг коррупцияга қарши экспертизасини ўтказиш соҳасида Ўзбекистон Республикаси ҳамда Беларусь Республикасининг тажрибаси” мавзусида вебинар ўтказилди. Вебинарда Беларусь Республикаси адлия вазири ўринбосари Н. Филиппова, Бош прокуратураси қошидаги Илмий-амалий марказ директори В. Марчук ва ушбу марказнинг бошқа масъул ходимлари, шунингдек, Ўзбекистон Республикаси Адлия вазирлиги, Бош прокуратураси, Коррупцияга қарши курашиш агентлиги, Ички ишлар вазирлиги ҳамда бошқа вазирлик ва идораларнинг масъул шахслари иштирок этди. Тадбирда Беларусь Республикаси Бош прокуратураси қошидаги Илмий-амалий марказнинг қонунчилик ҳужжатларини коррупцияга қарши экспертизадан ўтказиш асослари, тартиби, методологияси муҳокама қилинди. Марказ директори ўринбосари О.Русецкий қонунчилик ҳужжатларини криминологик экспертизадан ўтказишда унинг илмий жиҳатларига алоҳида эътибор қаратилиши, бу, ўз навбатида, экспертизанинг сифати ва коррупция хатари кам бўлган қонунчилик ҳужжатларини ишлаб чиқишга имконият яратишини таъкидлаб ўтди. Марказнинг экспертлари коррупцияга қарши экспертизанинг ҳуқуқий экспертизадан аниқ ажратишга имкон берадиган криминоген хатарларни баҳолаш мезонлари ҳақида маълумот беришди. Шунингдек, Марказнинг қонунчилик ҳужжатлари бўйича экспертиза хулосаси норматив-ҳуқуқий ҳужжатни қабул қилувчи органлар, шу жумладан Ҳукумат ва Парламент учун жуда аҳамиятли эканлиги билдирилди. Вебинарда иштирокчиларга Ўзбекистонда қонунчилик ҳужжатларини коррупцияга қарши экспертизадан ўтказишнинг янги механизми, коррупцияга қарши экспертизанинг мажбурий тартиби ҳақида маълумот берилди. Хусусан, коррупциявий омилларни аниқлаш бўйича жорий йил февраль ойида қонунчилик ҳужжатларини коррупцияга қарши экспертизадан ўтказиш бўйича янги тартиб ва методика амалга киритилганлиги, натижада охирги уч ойда Адлия вазирлигида ҳуқуқий экспертизадан ўтказилган лойиҳаларнинг 17 фоизида 167 та коррупциоген омиллар аниқланишига ҳамда уларнинг бартараф этилишига эришилганлиги қайд этилди. Бундан ташқари, амалдаги қонунчилик ҳужжатларини коррупцияга қарши экспертизадан ўтказиш тартиби жорий этилганлиги, ҳозирда вазирлик томонидан “коррупциясиз қонунчилик” лойиҳаси доирасида 20 мингдан ортиқ амалдаги қонунчилик ҳужжатларни келгуси 5 йил давомида коррупцияга қарши экспертизадан ўтказиш бўйича амалий ишлар бошланганлиги маълум қилинди. Шу билан бирга, вебинарда норматив-ҳуқуқий ҳужжатлар ва улар лойиҳаларини коррупцияга қарши экспертизадан ўтказиш тизимида мавжуд бўлган муаммоли ҳолатлар ва уларнинг ечими юзасидан фикрлар алмашинилиб, вебинар иштирокчиларини қизиқтирган саволларга атрофлича жавоб берилди. Беларусь Республикаси Бош прокуратураси қошидаги Илмий-амалий маркази томонидан Ўзбекистонда ушбу соҳада амалга оширилаётган ислоҳотларга қизиқиш билдирилиб, Марказ томонидан тайёрланаётган криминологик экспертизага оид илмий нашрлар тўпламига Ўзбекистоннинг ижобий тажрибаси киритилиши ҳақида таклиф билдирилди. Вебинар якунида томонлар, Беларусь Республикаси Адлия вазирлиги, Беларусь Республикаси Бош прокуратураси қошидаги Илмий-амалий марказ ҳамда Ўзбекистон Республикаси Адлия вазирлиги ўртасида коррупцияга қарши экспертиза соҳасида ўзаро ҳамкорликни йўлга қўйиш бўйича ишларни давом эттиришга келишиб олдилар.