“Ўзбекгидроэнерго” АЖ Бошқаруви раиси Абдуғани Сангинов ҳамда ХХРнинг “China Southern Power Grid International (HK) Co., Ltd” компанияси Бошқаруви раиси Чжан Танжи томонидан қиймати 1 млрд 640 млн АҚШ долларига тенг, қуввати 820 МВт бўлган 3 та лойиҳа: “Юқори Пскем” ГТEС (қуввати 200 МВт), “Қаратерен” ГТEС (500 МВт) ҳамда “Юқори Пскем” ГEС (120 МВт) гидроиншоотларини қуриш бўйича Англашув меморандум имзоланди. Меморандум доирасида дастлаб ўзбек-хитой компаниялари томонидан қўшма ишчи гуруҳи таркибини шакллантириш борасида келишиб олинди. Қўшма ишчи гуруҳи томонидан лойиҳаларнинг техник-иқтисодий асослари ишлаб чиқилади. Бу жараёнга халқаро тоифадаги эксперт-мутахассисларни ҳам жалб этиш кўзда тутилган. Маълум қилинишича, мазкур лойиҳалар 2030 йилга қадар тўлиқ қувватда ишга туширилади. ГТEСларнинг ишга туширилиши натижасида йилига ўртача 3 млрд кВт⋅соат электр энергияси ишлаб чиқарилиб, 835 млн 655 минг куб метр табиий газ тежалади. Шунингдек, атмосферага чиқувчи зарарли ис гази миқдори камайишига эришилади. Шунингдек, лойиҳалар тўлиқ қувватда ишга туширилгач, 1 млн 600 мингдан ортиқ аҳоли узлуксиз электр энергияси билан таъминланади.