Куни кеча, 9 июль куни Парижда пара енгил атлетика бўйича жаҳон чемпионати бошланди. Мазкур мусобақада аёллар ўртасида Т11 классида узунликка сакраш баҳсларида Ўзбекистон шарафини ҳимоя қилган Асила Мирзаёрова 5 метр 13 см кўрсаткич билан энг яхши натижани қайд этди ва олтин медални қўлга киритди. Эътиборлиси, Токио-2020 ёзги Паралимпия ўйинлари кумуш медаль соҳибаси жаҳон чемпионатидаги ушбу натижаси орқали келгуси йил Парижда бўлиб ўтадиган навбатдаги ёзги Паралимпия ўйинларига лицензияни ҳам қўлга киритди. Аёллар ўртасида F41 классида ядро улоқтириш баҳсларида иштирок этган Кубаро Ҳакимова эса 9 метр 83 см натижа билан кумуш медални ўзиники қилган ҳолда у ҳам Париж-2024 ёзги Паралимпия ўйинларига лицензияни нақд қилди. Қайд этиш мумкин, бу пара енгил атлетикачиларимиз орасида Париж-2024 Паралимпия ўйинлари учун илк лицензиялар ҳисобланади.