Хоразм вилояти Урганч шаҳри ҳокими лавозимида ишлаган Шуҳрат Абдуллаев 3 йил муддатга озодликдан маҳрум этилгани ҳақида хабар берилган эди. Олий суд матбуот котибининг хабарига тайаниб, “Дарё” нашрининг маълум қилишича, собиқ ҳоким озод қилинди. Келтирилишича, Жиноят ишлари бўйича Хива туман судининг 4 июлдаги ҳукмига кўра Ш.А. (1967 йилда Хоразм вилоятида туғилган, муқаддам судланмаган, 2018—2020 йиллар мобайнида Урганч шаҳар ҳокими лавозимида ишлаган) Жиноят кодексининг 209-моддаси (мансаб сохтакорлиги) 2-қисми “а” банди ва 229-4-моддаси (ер бериш тартибини бузиш) 2-қисми “а”, “б” бандларида назарда тутилган жиноятларни содир этганликда айбли деб топилиб, унга 2 йилга муайян ҳуқуқдан, яъни давлат органи, давлат иштирокидаги ташкилот ва фуқароларнинг ўзини ўзи бошқариш органларида мансабдор ва моддий жавобгар шахс лавозимларида ишлаш ҳуқуқидан маҳрум қилган ҳолда 3 йил муддатга озодликдан маҳрум қилиш жазоси тайинланган. Хоразм вилоят суди аппеляция инстанциясининг 4 августдаги ажрими билан биринчи инстанция судининг ҳукми ўзгаришсиз қолдирилган. Олий суднинг Жиноят ишлари бўйича судлов ҳайъати ушбу жиноят ишинининг Ш.А.га оид қисмини судланган Ш.А.нинг адвокатлари томонидан асоссиз судлангани ва унинг ҳаракатларида жиноят аломатлари йўқлиги сабабли унга нисбатан оқлов ҳукми чиқариш ҳақидаги кассация шикоятлари ҳамда Хоразм вилоят прокурори томонидан айбига иқрорлиги, қилмишидан пушаймонлиги, муқаддам судланмагани ва етказилган моддий зарар қопланганини инобатга олиб, унга нисбатан озодликдан маҳрум қилиш билан боғлиқ бўлмаган жазо тайинлаш ҳақида келтирган протест асосида кассация тартибида кўриб чиқди. Олий суд кассация инстанциясининг 29 августдаги ажримига мувофиқ юқоридаги суд қарорлари ўзгартирилиб, судланган Ш.А. айбига иқрорлиги, қилмишидан пушаймонлиги, муқаддам судланмагани ва иш бўйича етказилган моддий зарарни ихтиёрий равишда тўлиқ қоплаганини инобатга олган ҳолда унга базавий ҳисоблаш миқдорининг 500 баравари миқдорида жарима жазоси тайинланди. Шу тариқа, протест тўлиқ, шикоятлар эса қисман қаноатлантирилди. Ш.А. жазони ижро этиш жойида қамоқдан озод қилиниши белгиланди.