АҚШ Халқаро тараққиёт агентлиги (USAID) маъмури Саманта Пауэр жорий йилнинг 23-24 октябрькунлари Ўзбекистонга келади. Қайд этилишича, у минтақавий алоқалар бўйича C5+1 шаклидаги биринчи вазирлар йиғилишини ўтказади ва АҚШ ҳукуматининг минтақа мамлакатлари мустақиллиги, суверенитети ва фаровонлигига содиқлигини таъкидлайди. “АҚШ ҳукуматининг C5+1 мулоқоти 2015 йилдан буён Қозоғистон, Қирғизистон, Тожикистон, Туркманистон ва Ўзбекистон билан асосий дипломатик платформаси бўлиб хизмат қилмоқда. Тараққиёт масалалари бўйича вазирлар учрашуви минтақавий ўзаро алоқалар, савдо, иқтисодий ўсиш ва тадбиркорлик, иқлимий ва энергетик ечимлар, шунингдек, ёшлар учун имкониятларга эътибор берган ҳолда Марказий Осиёда инклюзив, барқарор иқтисодий ривожлантиришни таъминлаш бўйича аниқ чоралар кўриш учун бешта давлат вазирларини тўплаб, ушбу платформани мустаҳкамлайди”, –дейилади USAID хабарида.