САВОЛ. Алимент тўлашга қийналяпман. Алиментни отамнинг пенсиясига қаратиб, ўзим чет элга ишлаш учун кетсам бўладими? ЖАВОБ. Оила кодексининг 96-моддасига кўра, ота-она вояга етмаган болаларига таъминот бериши шарт. Вояга етмаган болаларига таъминот бериш мажбуриятини ихтиёрий равишда бажармаган ота (она)дан суднинг ҳал қилув қарорига ёки суд буйруғига асосан алимент ундирилади. “Суд ҳужжатлари ва бошқа органлар ҳужжатларини ижро этиш тўғрисида”ги Қонунинг 46-моддасига кўра, қуйидагилар мажбурий ижро этиш чоралари ҳисобланади: 1. Ундирувни қарздорнинг пул маблағларига ва бошқа мол-мулкига қаратиш. 2. Ундирувни қарздорнинг бошқа шахсларда турган пул маблағларига ва бошқа мол-мулкига қаратиш. 2-1. Ундирувни қарздорнинг дебиторлик қарзига, шу жумладан қарздор ундирувчи сифатида иштирок этаётган ижро ҳужжати бўйича унга тегишли бўлган маблағларга қаратиш. 2-2. Ундирувни қарздорга тегишли бўлган алоҳида мулкий ҳуқуқларга қаратиш. 3. Ундирувни қарздорнинг иш ҳақи, стипендияси, пенсияси ва бошқа турдаги даромадларига қаратиш; 4. Ижро ҳужжатида кўрсатилган муайян ашёларни қарздордан олиб қўйиш ва ундирувчига топшириш. 5. Ижро ҳужжатининг ижро этилишини таъминловчи қонунларга мувофиқ кўриладиган бошқа чоралар. Юқорида қайд қилинган қонун талабига кўра, алиментни бобо-бувисининг пенсиясига қаратиш назарда тутилмаган. Болаларнинг ота-онаси йўқ бўлган ёки улардан таъминот ололмайдиган ҳолларда таъминот бериш мажбурияти етарли маблағга эга бўлган бобо ва буви зиммасига юклатилиши мумкин.  Бунда, суд алимент миқдорини, қарздорнинг ҳамда ундирувчи (даъвогар)нинг моддий ва оилавий аҳволини ҳисобга олган ҳолда, ҳар ойда пул билан тўланадиган қатъий суммада белгилайди.

Саволга фуқаролик ишлари бўйича Яккасарой туманлараро суди раиси Ғайрат Эргашев жавоб берди.