Янги тартибга кўра, ҳижоб қонунини иккинчи марта бузган ҳолда қўлга олинганлар судга топширилади, ҳижобсиз йўловчи аёлни олиб кетаётган машиналар мусодара қилинади. Эронлик аёллар ҳукуматнинг мажбурий кийиниш қоидаларини қўллаш учун технологиядан фойдаланишга бўлган янги уринишларига қарши чиқмоқда. Апрел ойида миллий полиция бошлиғи Аҳмад Ризо Радан жарима ёки қамоқ жазоси таҳдидига қарамай, жамоат жойларида сочини ёпмаган ёки кенг кийим киймаган аёлларни аниқлаш учун “ақлли” кузатув камераларининг ишга туширилганини эълон қилган эди. У ҳижоб қонунини иккинчи марта бузганлар судга топширилиши, сочи очиқ ҳолдаги йўловчи аёлни олиб кетаётган машиналар мусодара қилиниши, бу тартибга кўз юмган корхоналар ёпилиши ҳақида огоҳлантирди. Бироқ унинг бу баёноти ижтимоий тармоқларда истеҳзоларга сабаб бўлди, аёллар бутун мамлакат бўйлаб жамоат жойларида ҳижобсиз суратлари ва видеоларини жойлаштиришмоқда. Аксарият одамлар транспорт назорати камералари орқали ўз автомобиллари ичидаги кийим-кечак қоидаларининг бузилиши ҳақида огоҳлантирувчи хабарлар олишганини таъкидлашмоқда. Расмийлар бунинг учун машиналарни мусодара қилиш ёки одамларни жаримага тортиш билан биринчи марта таҳдид қилмоқда. “Менга бир ойлар олдин, дўстларим билан Дамғон шаҳрига қилган саёҳатимдан сўнг давлат рақамим кўрсатилган СМС олдим. Биз машинада ҳижобда эмас эдик”, деган бир аёл нашрга берган интервюсида. Айни пайтда аёллар жазоланиш хавфи кучайганига қарамай, мажбурий ҳижобга қарши курашни давом эттиришга тайёр эканликларини билдиришган. Бу воқеалар 22 ёшли қиз ҳижобни “нотўғри” ўраганлиги боис ахлоқ полицияси томонидан ҳибсга олиниб, кейин вафот этгани ортидан бошланган эди.