Фармацевтика тармоғини ривожлантириш агентлиги директори Улуғбек Эгамов раислигида Афғонистон Озиқ-овқат ва дори-дармон миллий идораси (AFDA) раиси доктор Абдул Бори Умар билан музокара бўлиб ўтди. Бу ҳақда УзА хабар берди. Онлайн тарзда Ўзбекистон ва Афғонистон фармацевтика соҳалари алоқасини мустаҳкамлаш, қўшма лойиҳалар ишга тушириш, экспортни рағбатлантириш мақсадида ташкил этилган мулоқотда маҳсулотларимиз Осиёнинг кўплаб давлатларига экспорт қилинаётгани маълум қилинди, Афғонистон корхоналари билан қўшма лойиҳалар ишга тушириш борасидаги таклифлар ўртага ташланди. Бундан ташқари, махсус учрашув уюштириб, Афғонистонинг йирик дистрибюторларини Ўзбекистонда ишлиб чиқарилаётган маҳсулот тур ва хиллари билан таништириш, икки мамлакат техник ишчи гуруҳини тузиш ташаббуси илгари сурилди. Самарали ахборот алмашув, муаммони ҳал қилиш бўйича амалий чора кўриш тизимини шакллантиришга қаратилган келишув имзолаш масаласи ҳам муҳокама қилинди. Суҳбат чоғида Ўзбекистон фармацевтика маҳсулотлари ишлаб чиқарувчи корхоналарининг Афғонистонда ўтадиган дори-дармон бўйича давлат хариди – тендерида иштирокини таъминлаш, ушбу юртда маҳсулотларимиз шоурумини уюштириш, товарларимизни тегишли идораларда рўйхатдан ўтказиш тартиби ва муддатини қисқартириш маъқулланди. Ҳамкорлар таклифлар ишлаб чиқиш ва маълумот алмашиш учун қўшма техник ишчи гуруҳ тузиш таклифини қўллаб-қувватлади. Тузилма таркибини тез орада тасдиқлаш ва тақдим этишга қарор қилинди.