Испания терма жамоаси собиқ футболчиси Ана Ромеро Испания Қироллик футбол федерацияси (RFEF)) раҳбари Луис Рубиалесни аёллар ўртасидаги ЖЧ-2023даги аҳлоқсизлиги туфайли истеъфога чиқишга чақирди. Бу ҳақда спортчи Twitterʼда гапирди. “Сиз истеъфога чиқишингиз керак. Ёки сизни ишдан бўшатиш керак, жаноб Рубиалес, шунда бундай хатти-ҳаракатлар одатий ҳол эмаслиги дарҳол аён бўлади”, деди Ромеро. Аввалроқ, 24 август куни Халқаро футбол федерацияси (ФИФА) турнирдаги воқеа туфайли Рубиалесга нисбатан интизомий иш очганди. Ташкилот барчанинг дахлсизлигини ҳурмат қилиш тарафдори эканлиги ва бунга зид бўлган ҳар қандай ҳаракатни кескин қоралашини таъкидлади. Маълумот ўрнида, аёллар ўртасидаги Жаҳон чемпионати финалида Испания терма жамоаси Англияни 1:0 ҳисобида мағлуб этди. Тақдирлаш маросимида Рубиалес Испания терма жамоаси сардори Женнифер Эрмосога медаль тақиб, футболчининг лабларидан ўпган. Кейинчалик футболчи бу иш унга ёқмагани ва бундан жаҳли чиққанини маълум қилган. Бу оммавий ахборот воситалари ва испан жамоатчилиги танқидига сабаб бўлган. Шундан кейин Рубиалес узр сўраган ва бундан ҳеч қандай ёмон нияти бўлмаганини айтган.