2023 йил 1 декабрдан бошлаб Адлия вазирлиги тизимида ходимларга меҳнат таътиллари тўлиқ “MinJust HR” – автоматлаштирилган тизими орқали расмийлаштирилмоқда. Бу ҳақда вазирликнинг Жамоатчилик билан алоқалар бўлими хабар бермоқда.

Мазкур жараённи рақамлаштириш орқали қуйидаги имкониятлар яратилди:

ходим кейинги иш йили учун меҳнат таътилига чиқиш санасини муcтақил белгилайди ва ушбу маълумотлар асосида Тизимда ҳар йилги таътиллар жадвали автоматик равишда шаклланади;

Муҳим жиҳати! Ишга қабул қилинганига 6 ой тўлмаган ходимларга олти ойдан аввалги муддатни белгилашга ҳамда иш йили давридан чиққан ҳолда меҳнат таътиллари кунларини танлашга йўл қўйилмайди (иш берувчи ва ходим ўртасида келишувга эришилган ҳолатлар бундан мустасно).

таътиллар жадвали ходимнинг Тизимдаги шахсий кабинетида автоматик равишда жойлаштирилади ва таништирилади;

таътил бериладиган вақт тўғрисида таътил бошланишидан камида 15 кун олдин Тизим орқали ходимнинг шахсий кабинетига автоматик равишда хабарнома юборилади;

ходим томонидан хабарнома билан танишилгандан сўнг Тизимда тегишли босқичлар белгиланади ва шакллантирилган маълумотлар кадрлар соҳасига масъул таркибий бўлинмага юборилади;

мазкур маълумотлар асосида меҳнат таътили бериш ҳақида буйруқ лойиҳаси автоматик шаклланади ва кадрлар соҳасига масъул таркибий бўлинма томонидан иш берувчига киритилади;

ходим буйруқ лойиҳаси тасдиқлангунига қадар меҳнат таътилига чиқиш билан боғлиқ шартларни ўзгартириши ва бу жараённи кузатиб бориши мумкин;

ходимнинг меҳнат қонунчилигидаги кафолатлари ва фойдаланилмаган таътил кунлари билан боғлиқ маълумотлар тегишли ахборот ресурс базаларидан интеграция орқали автоматик шакллантирилади.

Масалан: 18 ёшга тўлмаган шахслар; I ва II гуруҳ ногиронлиги бўлган шахслар; тармоқ тизимида кўп йиллик ишлаган даври; 12 ёшга тўлмаган икки ва ундан ортиқ болали ходимлар ҳақида ва бошқа.

Натижада:

таътилларни расмийлаштириш жараёни амалдаги 16 та босқичдан 4 та босқичга, яъни 75 фоизга қисқаради;

ходимнинг фойдаланган ва фойдаланмаган таътил кунларига оид актуал реестр шаклланади;

ходимларнинг таътилга чиқиш ҳуқуқи тўлиқ таъминланади;

бюрократик тўсиқларга чек қўйилади, инсон омили минимал даражага тушади;

таътилларни расмийлаштириш, шу жумладан, таътиллар жадвали, маълумотни йиғиш, тайёрлаш ва бошқа ишларга кетадиган вақт оптималлашади ва бу жараённинг очиқлиги таъминланади.