Фавқулодда вазиятлар вазирлиги “Cobalt” автомобили сув омборида сузиб юрганлиги тўғрисида ижтимоий тармоқларда тарқалган хабар юзасидан маълумот берди. Маълум бўлишича, 20 июнь куни соат 13:30 да Навоий вилояти Қизилтепа туманидаги “Тўдакўл” сув омборида Бухоро вилоятида туғилган фуқарога тегишли бўлган оқ рангли “Cobalt” автомобили ҳайдовчининг эҳтиётсизлиги оқибатида сув омборига оқиб кетган. Аниқланишича, сув омбори қирғоғида турган автомобилни кучли сув тўлқини оқим билан ичкарига олиб кирган. Қайд этилишича, ушбу вазият бўйича ФВВга маълумот келиб тушмаган ва воқеа жойидаги фуқаролар ёрдамида автомобил сувдан чиқариб олинган. Ҳодиса оқибатида тан жароҳати олган ва ҳалок бўлганлар йўқ.