Замонавий дунёда ахборот жамият тараққиётининг энг муҳим омили ҳисобланади. Aхборот жамияти даври келди ва унда ишчиларнинг аксарияти моддий неъматларни ишлаб чиқариш билан шуғулланмайдилар, балки уларнинг фаолияти маълумот олиш, тўплаш ва тарқатиш билан бевосита янги билимларни излаш билан боғлиқдир. Эндиликда, ахборотни ҳуқуқий тартибга солиш ва ахборот тизимларидан фойдаланиш олдида энг асосий вазифа — шахсий маълумотлар учун ҳуқуқий режим ўрнатиш тартиби турибди. Шахсий маълумотларни ҳимоя қилиш ҳуқуқи билан шахсий ҳаётга дахлдорлик ўртасидаги фарқ шундан иборатки, шахсий ҳаётга дахлдорлик ҳуқуқи бошқа нарсалар қатори шахсий ҳаёт билан боғлиқ маълумотларни ҳимоя қилишни назарда тутади. Ўзбекистон томонидан Инсон ҳуқуқлари Умумжаҳон декларациясининг  ратификация қилиниши шахсий ҳаёт дахлсизлиги ҳуқуқининг замонавий талқини, биринчи навбатда, шахснинг шахсий ҳаётдаги фаолиятини ҳимоя қилишни назарда тутади. Худди шу мақсадда 2019 йил 2 июлда Ўзбекистон Республикасининг “Шахсга доир маълумотлар тўғрисида”ги Қонуни қабул қилинди. Қонунга кўра қуйидагилар шахсий маълумотлар сарасига кирмайди:

• жисмоний шахс томонидан шахсга доир маълумотларга шахсий, маиший мақсадларда ва ўз касбий ёки тижорат фаолияти билан боғлиқ бўлмаган ҳолда ишлов бериш;
• миллий архив фонди ҳужжатларини ва шахсга доир маълумотларни ўз ичига олган бошқа архив ҳужжатларини шакллантириш, сақлаш ва улардан фойдаланиш;
• давлат сирларини ташкил этадиган маълумотлар жумласига киритилган шахсга доир маълумотларга ишлов бериш;
• тезкор-қидирув, разведка ва контрразведка фаолияти, жиноятчиликка қарши курашиш, ҳуқуқ-тартиботни сақлаш жараёнида, шунингдек, жиноий фаолиятдан олинган даромадларни легаллаштиришга қарши курашиш доирасида олинган шахсга доир маълумотларга ишлов бериш чоғида юзага келадиган муносабатларга нисбатан татбиқ этилмайди.

Шахсга доир маълумотлар соҳасини давлат томонидан тартибга солиш Вазирлар Маҳкамаси ва шахсга доир маълумотлар соҳасидаги ваколатли давлат органи томонидан амалга оширилади. Вазирлар Маҳкамаси ҳузуридаги Давлат персоналлаштириш маркази шахсга доир маълумотлар соҳасидаги ваколатли давлат органидир. Шахсга доир маълумотларни номуайян доирадаги шахсларга ошкор этишга, шу жумладан, шахсга доир маълумотларни оммавий ахборот воситаларида ҳаммага маълум қилишга, Интернет жаҳон ахборот тармоғига жойлаштиришга ёки шахсга доир маълумотлардан бирор-бир бошқа усул билан фойдаланиш имконини беришга қаратилган ҳаракатлар шахсга доир маълумотларни тарқатиш ҳисобланади. Ўзбекистон Республикасининг “Шахсга доир маълумотлар тўғрисида”ги Қонунининг 27-моддасига кўра, давлат шахсга доир маълумотларнинг ҳимоя қилинишини кафолатлайди. Шахсий маълумотларни ошкор қилганлик учун жавобгарлик қуйидагича: Маъмурий жавобгарлик тўғрисидаги кодексининг 46²-моддасига асосан, шахсга доир маълумотларни қонунга хилоф равишда йиғиш, тизимлаштириш, сақлаш, ўзгартириш, тўлдириш, улардан фойдаланиш, уларни бериш, тарқатиш, узатиш, эгасизлантириш ва йўқ қилиш, — фуқароларга базавий ҳисоблаш миқдорининг уч бараваридан беш бараваригача, мансабдор шахсларга эса — беш бараваридан ўн бараваригача миқдорда жарима солишга сабаб бўлади; Жиноят кодексининг 141²-моддасига асосан, шахсга доир маълумотларни қонунга хилоф равишда йиғиш, тизимлаштириш, сақлаш, ўзгартириш, тўлдириш, улардан фойдаланиш, уларни бериш, тарқатиш, узатиш, эгасизлантириш ва йўқ қилиш ўша ҳаракатлар учун маъмурий жазо қўлланилганидан кейин содир этилган бўлса, — базавий ҳисоблаш миқдорининг эллик бараваригача миқдорда жарима ёки уч йилгача муайян ҳуқуқдан маҳрум қилиш ёхуд икки йилгача ахлоқ тузатиш ишлари билан жазоланади.   Мақсуд Мустафоев, “Адолат” миллий ҳуқуқий ахборот маркази масъул ходими