Ижтимоий тармоқларда Чилонзор туманида оммавий пичоқбозлик бўлганлиги ҳақидаги хабарлар тарқалди. Ҳолат юзасидан Тошкент шаҳар Ички ишлар бош бошқармаси хабар берди. Қайд этилишича, бу хабар ҳақиқатдан йироқ. Жорий йилнинг 5 ноябрь куни тахминан соат 20:00 ларда 1988 йилда туғилган Х.Қ. ва 1993 йилда туғилган А.Н. ўртасида қарз масаласида ўзаро келишмовчилик бўлганлиги сабабли Чилонзор туманининг 20-мавзесида гаплашиб олиш учун учрашишган. Орада низо келиб чиққанлиги сабабли Х.Қ. томонидан А.Н.га ўткир тиғли жисм билан бир маротаба жароҳат етказилган, оқибатида А.Н. “Кўкрак қафаси чап томонлама кесилган, санчилган” жароҳати билан тез-тиббий ёрдам муассасасига олиб борилган. Шифокорлар томонидан кўрсатилган тиббий ёрдамдан сўнг А.Н. шу куннинг ўзида ҳеч кимга даъвоси йўқлигини маълум қилиб, шифохонадан чиқиб кетган. “Мазкур ҳолат юзасидан Чилонзор тумани ИИО ФМБ томонидан терговга қадар текширув ўтказилмоқда. Текширув якуни бўйича қонуний қарор қабул қилиниши таъминланади,” – дейилади хабарида.