Қишлоқ хўжалигида замонавий технологияларни жорий этиш, маҳсулот етиштириш ҳажмини ошириш ва тадбиркорлик фаолиятини қўллаб-қувватлашда иссиқхона хўжаликлари муҳим аҳамият касб этади. Шу муносабат билан иссиқхона бизнесини ривожлантириш, тадбиркорлар учун қулай шарт-шароитлар яратиш ҳамда уларнинг фаолиятини рағбатлантиришга қаратилган ҳуқуқий чора-тадбирлар долзарб аҳамият касб этмоқда. Иссиқхона хўжаликлари учун қонунчиликда назарда тутилаётган имтиёзлар ва қўллаб-қувватлаш механизмларини билиш тадбиркорларга мавжуд имкониятлардан самарали фойдаланиш ҳамда ўз фаолиятини тўғри ташкил этишда муҳим ўрин тутади.

Президентнинг 13.10.2026 йилдаги ПҚ-371-сон қарори иссиқхона соҳасида энергия тежамкор ва «яшил» технологияларни кенг кўламда жорий этишга қаратилган.

Ҳужжатда юридик шахслар учун ҳам, томорқа хўжалигини ривожлантираётган аҳоли учун ҳам жиддий солиқ имтиёзлари, электр энергияси учун субсидиялар ва имтиёзли молиялаштириш жорий этилмоқда. Қабул қилинган чора-тадбирлар маҳаллий иссиқхоналарни янада барқарор ва рентабелли қилишга қаратилган.

 

Юридик шахслар учун нималар кўзда тутилган

 

Тижорат иссиқхона хўжаликлари ва тадбиркорлар учун ҳужжат солиқ имтиёзлари ва молиявий преференцияларнинг бутун бир пакетини мустаҳкамлайди:

• қишлоқ хўжалиги товар ишлаб чиқарувчилари ҚҚСнинг ноль фоизли ставкаси билан ишлашни давом эттирмоқда;

• агросаноат ишлаб чиқарувчилар ва балиқчилик хўжаликлари учун ўз қишлоқ хўжалиги маҳсулотларини сотишдан олинган фойда Солиқ кодексига мувофиқ ноль фоизли ставка бўйича фойда солиғига тортилади;

• агар иссиқхона фаолиятидан олинган даромадлар жорий ҳисобот (солиқ) даври якунларига кўра иссиқхона хўжаликлари умумий даромадининг камида 60 фоизини ташкил этса, улар учун ижтимоий солиқ ставкаси 1 фоиз миқдорида сақлаб қолинади (амал қилиш даври – 2026 йил 1 январдан 2029 йил 1 январгача).

Иссиқхона даромадларининг улуши бир хил (60 фоиз ва ундан юқори) бўлган тадбиркорлик субъектлари учун 2027 йил 1 январдан 2030 йил 1 январгача бўлган даврда:

• юридик шахслардан олинадиган ер солиғи ва мол-мулк солиғи ставкалари 50 фоизга камайтирилади;

• айланмадан олинадиган солиқдан тўлиқ озод қилиш жорий этилади.

Бекжон Исмаилов,
ҳуқуқшунос