Жорий йилнинг 27-июлдан 5-август кунлари давомида Ўзбекистон Республикаси Энергетика вазирлиги ҳузуридаги Электр энергияси, нефт маҳсулотлари ва газдан фойдаланишни назорат қилиш инспекцияси (“Ўзенергоинспекция”) ҳамда ҳуқуқни муҳофаза қилиш органлари ва “Ҳудудгазтаъминот” АЖ ходимлари билан ҳамкорликда Тошкент вилояти ҳамда Тошкент шаҳрида жойлашган автомобилларга газ тўлдириш компрессор шохобчалари (АГТКШ)да табиий газдан ноқонуний фойдаланиш ҳолатларини аниқлаш бўйича тезкор тадбирлар ўтказилди. Бу ҳақда Энергетика хизмати ахборот хизмати маълум қилди. Хусусан:

• “Камолот истиқлол кўмакчиси” МЧЖга қарашли 3 та АГТКШнинг саноат тармоғидаги уланиш нуқтасида истеъмол қилинган табиий газ ҳажми ҳисобини юритиш учун ўрнатилган ЭГХУларининг электрон хотира маълумотлари йўқотилишига йўл қўйилганлиги, бунинг натижасида табиий газдан ноқонуний фойдаланилганлиги юзасидан далолатнома расмийлаштирилиб, “Камолот истиқлол кўмакчиси” МЧЖ-1 шохобчаси томонидан қиймати 1 млрд 302 млн 579 минг сўмлик (1 302 579 метр куб табиий газ), “Камолот истиқлол кўмакчиси” МЧЖ-2 шохобчасида қиймати 4 млрд 623 млн 523 минг сўмлик (4 623 523 метр куб табиий газ) ва “Камолот истиқлол кўмакчиси” МЧЖ-3 шохобчасида эса 1 млрд 896 млн 573 минг сўмлик (1 896 573 метр куб табиий газ) ҳажмда табиий газдан ноқонуний фойдаланганлиги аниқланди.
• Тошкент вилояти, Чиноз тумани, “Чинмасжид” МФЙда жойлашган “Кошона пойдевори” МЧЖга қарашли АГТКШда эса дастлабки ҳисоб-китобларга асосан, 1 млрд 907 млн 168 минг сўмлик (1 907 168 метр куб табиий газ) ҳажмда табиий газдан ноқонуний фойдаланилганлиги аниқланди.
• Тошкент шаҳри, Сергели тумани, “Қорасув” МФЙ, Хонобод кўчасида жойлашган “Нур Зиёд файз бизнес” МЧЖга қарашли АГТКШда дастлабки ҳисоб-китобларга асосан, 1 млрд 324 млн 800 минг сўмлик (1 324 800 метр куб табиий газ) ҳажмда табиий газдан ноқонуний фойдаланилганлиги аниқланди.

Ушбу ҳажмдаги табиий газ ўртача 6 мингта хонадоннинг бир йиллик истеъмолини ташкил қилади. Аниқланган ҳолатлар юзасидан расмийлаштирилган ҳужжатлар белгиланган тартибда ҳуқуқни муҳофаза этувчи органларига тақдим қилинди. Ҳозирги вақтда табиий газдан ноқонуний фойдаланиш ҳолатларини аниқлаш бўйича тезкор тадбирлар давом этмоқда.